चुनावी गठबन्धन एमालेसँग हुन्छः कमल थापा
वि.सं.२०७८ चैत २२ मंगलवार १०:३०
रामेछापः राप्रपा नेपालका अध्यक्ष कमल थापाले आगामी स्थानीय तहको निर्वाचनमा एमालेसँग गठबन्धन हुने बताएका छन् ।
राप्रपा नेपाल जिल्ला कार्यसमिति रामेछापले आयोजना गरेको जिल्ला स्तरीय कार्यकर्ता भेलामा बोल्दै अध्यक्ष थापाले उक्त कुरा बताएका हुन् ।
निर्वाचन केन्द्रित गठबन्धनको विषयलाई लिएर एमालेसँग छलफल शुरु भइसकेको बताउँदै अध्यक्ष थापाले केहि स्थानमा स्थानीय आवश्यकताका आधारमा पनि गठबन्धन हुन सक्ने बताए ।
राजसंस्थाको विषयमा आफुले १५ बर्ष सम्म वकालत गरेर गल्ती गरेको बताउँदै थापाले पूर्व राजाकै असहयोगका कारण आफ्नो पार्टीले अहिले राजसंस्थाको मुद्धा छाडिदिएको बताए ।
अहिले जनता र राजाको दुरी बढेको बताउँदै अध्यक्ष थापाले निर्मल निवासले राप्रपाको आन्तरिक मामलामा हस्तक्षेप गर्नु गल्ती भएको दावी गरे ।
आफुले राजसंस्थाका बारेमा वकालत गरेर हिड्दा पनि राजाले असहयोग गरेको आरोप लगाउँदै अध्यक्ष थापाले अहिले जनताको मनबाट राजसंस्था हटेको बताए ।
अध्यक्ष थापाले अर्को एक फरक प्रसंगमा प्रधानमन्त्री शेर बहादुर देउवाको भारत भ्रमणका क्रममा नेपालले आफ्नो तर्फबाट आफ्ना गुनासो सुनाउने मात्र काम गरेको बताए ।
राप्रपा नेपालका रामेछाप अध्यक्ष रामचन्द्र कडेंलको अध्यक्षतामा भेला सम्पन्न भएको हो ।
वि.सं.२०७८ चैत २२ मंगलवार १०:३०