अखबार नेपाल ट्रेन्डिङ

एजेन्सीः एफए कप फुटबलमा म्यानचेस्टर सिटी पाँचौं चरणमा प्रवेश गरेको छ । आइतबार भएको खेलमा घरेलु मैदानमा सिटीलाई जित दिलाउन ग्राबियल जिससले दुई गोल गरे । यस्तै इल्के गुण्डोगान र बेर्नार्डो सिल्भाले एक एक गोल गरे । खेलको छैटौं मिनेटमा टिम रिआमले रातो कार्ड पाएपछि फुलहम सुरुवातमै १० खेलाडीमा समेटिएको थियो ।

सिटीका जिससलाई डिबक्सभित्र फउल गरेपछि रिआमले रातो कार्ड पाएका थिए । जसमा पाएको पेनाल्टीमा गुण्डोगानले गोल गर्दै सिटीलाई अग्रता दिलाएका थिए । १९ औं मिनेटमा सिल्भाले गोल गर्दै सिटीको अग्रता २-० को बनाए । यस गोलसँगै सिटीले यस सिजन सबै खाले प्रतियोगितामा एक सय गोल पुरा गर्यो । यस्तै खेलको ७२औं मिनेटमा जिससले गोल गर्दा सिटीको अग्रता तेब्बर बन्यो । त्यसपछि खेलको ८५औं मिनेटमा जिससले व्यक्तिगत दोस्रो गोल गर्दा सिटी ४-० ले विजयी भयो ।