अखबार नेपाल ट्रेन्डिङ

काठमाडौः सहिद स्मारक ए डिभिजन लिगमा आज दुई खेल हुदैछ । दशरथ रंगशालामा हुने पहिलो खेलमा थ्री स्टार र फ्रेन्ड्स तथा दोस्रो खेलमा सरस्वती र ब्रिगेड ब्वाईज भिड्दैछन् ।

लिग अन्तर्गत छैठौ चरणमा दुई ललितपुरे टिम भिड्न लागेका हुन् । लिगमा थ्री स्टारले तीन खेलमा जित, समान एक खेलमा बराबर तथा हार ब्यहोरेको छ । यस्तै फ्रेण्ड्स भने रेलिगेशन जोनमा रहेको छ । उसले २ बराबरी र ३ खेलमा हार ब्यहोरेको छ । एक खेल कम खेलेका थ्री स्टार चौथो स्थानमा छ । फ्रेण्ड्स १३ औं स्थानमा छ ।

छैठौ खेलमा जित निकाल्दै लिग तालिकको दोस्रो स्थानमा उक्लने मौका थ्री स्टारलाई छ । तीन अंक हासिल गरेमा फ्रेण्ड्स भने आठौं स्थानमा उक्लिनेछ । दुबै टिम स्पष्ट तीन अंकका लागि खेल्दैछन् । थ्री स्टार फ्रेण्ड्सलाई पराजित गर्दै लिगमा लगातार दोस्रो जित निकाल्ने दाउमा हुनेछ । यस्तै फ्रेण्ड्स भने लगातार दोस्रो अंक खोस्ने दाउमा हुने छ । यसैबीच रेलिगेशन जोनमा रहेका सरस्वतीले आज ब्रिगेड व्वाईज क्लबको सामना गर्दैछ ।

लिगको छैठौ खेलमा समान स्तरको टिम पाएको सरस्वती पहिलो जित निकाल्ने दाउमा छ । लिगमा सुरुवाती पाँचै खेल गुमाउँदा सरस्वतीले १० गोल ब्यहोरेको छ र मात्र एक गोल गरेको छ । लिगमा सरस्वतीलाई पराजित गर्दै ब्रिगेडले तेस्रो जित निकाल्ने योजनामा छ ।

यसैबीच लिग अन्तर्गत हिजो भएको खेलमा जावलाखेललाइ हराउँदै मछिन्द्र फुटबल क्लब सहिद स्मारक ‘ए’ डिभिजन लिगको शीर्षस्थानमा उक्लिएको छ । अपराजित मच्छिन्द्रले जावलाखेल युथ क्लबलाई १-० गोलअन्तरले पछि पारेको हो । मछिन्द्रको साँघुरो जितका लागि खेलको ३१ औं मिनेटमा विशाल राईले निर्णायक गोल गरेका हुन् ।

जीतसँगै ६ खेलमा १३ अंक जोडेको मच्छिन्द्र त्रिभुवन आर्मी क्लबलाई १ अंकले पछिपार्दै लिगको शीर्षस्थानमा उक्लिएको छ । मछिन्द्रसँग पराजित भएसँगै जावलाखेलको अपराजित यात्रामा विराम लागेको छ । लिगमा पहिलो हार व्यहोरेको जावलाखेल ६ खेलमा ९ अंकसहित पाँचौं स्थानमा छ । यसैगरी हिजो भएको अर्को खेलमा मनाङ मर्स्याङदी र हिमालयन शेर्पाले गोलरहित बराबरी खेल्दै अँक बाडेका छन् ।