अखबार नेपाल ट्रेन्डिङ

एजेन्सीः चेल्सी एफए कप फुटबलको चौंथो चरणमा प्रवेश गरेको छ । आईतबार राती भएको तेस्रो चरणको खेलमा नोटिङघम फोरेस्टलाई २-० गोल अन्तरले पराजित गर्दै चेल्सी चौंथो चरणमा प्रवेश गरेको हो । घरेलु मैदानमा चेल्सीलाई जित दिलाउन कलुम हड्सन र रोस बार्क्लीले एक एक गोल गरे ।

स्टामफोर्ड ब्रिजमा खेलको सातौं मिनेटमा हड्सनले गोल गर्दै चेल्सीलाई अग्रता दिलाएका थिए । त्यसपछि खेलको ३३ औं मिनेटमा बार्क्लीले गोल गर्दै चेल्सीलाई २-० को जित दिलाए । टोटेनहम भने च्याम्पियनसिप क्लब मिडल्सबर्गसँग १-१ गोलको बराबरीमा रोकिएको छ ।

बराबरीसँगै टोटेनहमले मिडल्सबर्गसँग पुन: रिप्ले खेल खेल्नु पर्ने भएको छ । यस्तै सेफिल्ड युनाइटेडले एएफसी फ्लेडलाई २-१ ले हराएर चौंथो चरणमा प्रवेश गर्दा क्रिस्टल प्यालेस डर्बी काउन्टीसँग १-० ले पराजित भएको छ ।

यसैबीच इन्ग्लिश प्रिमियर लिग लिडर लिभरपुल एफए कप फुटबलको चौंथो चरणमा प्रवेश गरेको छ । आईतबार राती भएको तेस्रो चरणमा एभर्टनलाई १-० गोल अन्तरले पराजित गर्दै लिभरपुल चौंथो चरणमा प्रवेश गरेको हो । घरेलु मैदानमा लिभरपुललाई जित दिलाउन १८ वर्षे युवा खेलाडी कुर्टिस जोन्सले निर्णायक गोल गरे ।

पहिलो हाफ गोलरहित बराबरीका सकिएको खेलको ७१ औं मिनेटमा जोन्सले निर्णायक गोल गरे । एभर्टनको खेलसँगै ताकुमी मिनामिनोले लिभरपुलमा डेब्यु गरेका छन् । जापानी मिनामिनो जनवरी ट्रान्सफरमा रेडबुल साल्जबर्गबाट लिभरपुल आएका हुन् । प्रिमियर लिग प्रतिद्वन्द्वी एभर्टनविरुद्ध लिभरपुलले युवा खेलाडीलाई मैदान उतारेको थियो ।