अखबार नेपाल ट्रेन्डिङ

एजेन्सीः भारतको नयाँदिल्लीस्थित जवाहरलाल नेहरु विश्वविद्यालय (जेएनयु) मा नकाबधारीहरुले हमला गरेका छन् । छात्राबासको कोठा-कोठामा पुगेर विद्यार्थीमाथि आक्रमण गरिएको र जेएनयु छात्र संघका अध्यक्षमाथि हमला भएको अन्तर्राष्ट्रिय सञ्चारमाध्यमहरुले उल्लेख गरेका छन् ।

प्रत्यक्षदर्शीहरुका अनुसार जेएनयुभित्र भाला र लाठी बोकेका ५० भन्दा बढी नकाबधारीहरु छिरेका थिए । उनीहरुले अन्धाधुन्ध आक्रमण गरेपछि घाइते भएका विद्यार्थीहरुलाई सातवटा एम्बुलेन्सबाट लगातार अस्पताल पठाउनुपरेको थियो । घाइतेहरुलाई अहिले एम्स ट्रमा सेन्टरमा राखिएको छ । यतिखेर जेएनयुको प्रवेशद्वारमा ठूलो संख्यामा प्रहरी तैनाथ गरएको छ । दिल्ली प्रहरीको मूख्यालय बाहिर यो हमलाको विरुद्धमा प्रदर्शन भइरहेको छ ।

घाइते भएका शिक्षक र विद्यार्थीहरुलाई तत्काल चिकित्सकीय सहायता दिन र हमलाकारीहरुलाई गिरफ्तार गर्न उनीहरुले माग राखेका छन् । जेएनयु प्रशासनले विश्वविद्यालयमा भएको हिंसाको निन्दा गरेको छ । वामपन्थी आन्दोलनको गढ मानिने जेएनयुमा भारतीय सत्ताधारी दल भाजपाका कार्यकर्ताले आक्रमण गरेको हुनसक्ने आशंका गरिएको छ । तर भारतीय मन्त्रीमण्डलमा रहेका मन्त्रीहरुले ट्वीटरमा यो हमलाको विरोध गरिरहेका छन् ।