अखबार नेपाल ट्रेन्डिङ

काठमाडौं: दोस्रो संस्करणको नेपाल प्रिमियर लिग (एनपीएल) अन्तर्गत आज दुई खेलहरु हुँदैछन् । पहिलो खेलमा चितवन राइनोज र कर्णाली याक्सबीचको खेल बिहान ११:४५ बजे सुरु हुनेछ । दोस्रो खेलमा भने विराटनगर किंग्स र पोखरा एभेन्जर्सले प्रतिस्पर्धा गर्नेछन् । यो खेल दिउँसो ४ बजे सुरु हुनेछ ।

पहिलो खेलमा चितवन कुशल मल्लको कप्तानीमा मैदानमा उत्रने छ भने कर्णालीबाट कप्तान सोमपाल कामी छन् । दोस्रो खेलमा विराटनगर सन्दीप लामिछानेको कप्तानीको टिम हो भने पोखाराका कप्तान कुशल भुर्तेल हुन् । सोमबार भएको उद्घाटन खेलमा साबिक विजेता जनकपुर बोल्ट्स र काठमाडौं गोर्खाजसँग ५ विकेटले पराजित भएको छ ।

एनपीएल दोस्रो सिजनका सबै खेल कीर्तिपुरस्थित त्रिवि मैदानमा दिउँसो र राति गरेर हुनेछन् । नेपाल क्रिकेट संघ (क्यान) ले हरेक खेलका लागि ९ हजार ४५० टिकट बिक्री गर्ने जनाएको छ । एनपीएल मङ्सिर १ देखि २७ गतेसम्म सञ्चालन हुनेछ । एनपिएलमा लिग चरण, तीन वटा प्लेअफ र फाइनलसहित ३२ खेलहरु हुँदैछन् ।

शनिबारका लागि टिकट मूल्य साधारणतर्फ ५०० र प्रिमियमतर्फ १५०० रुपियाँ राखिएको छ । यसैगरी लिग चरण र अन्य दिनको खेलका लागि टिकटको मूल्य ५०० र १००० तोकिएको छ । प्लेअफपछिका खेलका लागि जनरलतर्फ १००० र प्रिमियरतर्फ २००० रुपियाँ राखिएको छ । क्यानले सिजनल टिकटको एकमुस्ट मूल्य १५ हजार रुपियाँ तय गरेको छ ।

एनपीएलमा जनकपुर, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किंग्स, चितवन राइनोज, काठमाण्डु गुर्खाज र लुम्बिनी लायन्स गरेर आठ फ्रेन्चाइज टोलीले प्रतिस्पर्धा गर्दैछन् ।