अखबार नेपाल ट्रेन्डिङ

काठमाडौं: दोस्रो संस्करणको नेपाल प्रिमियर लिग (एनपिएल) को खेलाडी छनोटका लागि हुने अक्सनमा सहभागी हुने खेलाडीको सूची सार्वजनिक भएको छ । नेपाल प्रिमियर लिग (एनपिएल) ले मंगलबार अक्सनमा सहभागी रहने १५० जना खेलाडीको अन्तिम सूची सार्वजनिक गरेको हो । अक्सनका लागि ४५८ जनाले आफ्नो नाम रजिस्ट्रेसन गराएका थिए ।

एनपिएलमा सहभागी ८ टोलीले इच्छाएका तथा नेपाल क्रिकेट संघ क्यानको प्राविधिक टोलीले बनाएको मापदण्डमा रहेका १५० खेलाडीलाई अन्तिम सूचीमा समावेश गरेको हो । १५० खेलाडी विभिन्न श्रेणीमा विभाजन भएका छन् । श्रेणी ‘ए’ मा ८ जना, श्रेणी ‘बी’ मा ३५ तथा श्रेणी ‘सी’ मा १०७ खेलाडी रहेका छन् । १५० जना खेलाडीले अन्तिम सूचीमा आफुलाई पाएपनि जम्मा ३७ खेलाडीमा मात्र बोली लाग्नेछ । ‘ए’ ग्रेडमा आदिल अन्सारी, सरद भेषावकर, अर्जुन साउद, देव खनाल, दिलिप नाथ, पवन सरार्फ, सूर्य तामाङ र सुनम गौतम छन् । त्यस्तै ‘बी’ ग्रेडमा अनिल खरेल, अर्जुन कुमाल, दीपक बोहोरा, कृष्ण कार्की, प्रज्वल थापालगायत खेलाडी छन् ।

कुन श्रेणीमा कति खेलाडी आवश्यक

श्रेणी ‘ए’ – ४

श्रेणी ‘बी’ – २३

श्रेणी ‘सी’ – १०

जम्मा – ३७

न्युनतम र अधिकतम मुल्य

श्रेणी ‘ए’ न्यूनतम् १० लाख – अधिकतम १५ लाख

श्रेणी ‘बी’ न्यूनतम् ५ लाख – अधिकतम १० लाख

श्रेणी ‘सी’ न्युनतम २ लाख – अधिकतम ५ लाख