अखबार नेपाल ट्रेन्डिङ

काठमाडौं: नेपालको महिला युवा टिम पहिलो पटक एएफसी यु-२० महिला एसियन कप खेल्न भुटान पुगेको छ । भुटानको थिम्पुमा आजदेखि एएफसी यु-२० महिला एसियन कप छनोट समूह ‘ए’ सुरु हुँदैछ । समूह ‘ए’ मा रहेको नेपालले आफ्नो छनोट खेल घरेलु टोली भुटानविरूद्धको खेलबाट सुरू गर्नेछ । खेल थिम्पुस्थित चाङलिमियाङ स्टेडियममा ५:४५ बजे सुरू हुनेछ ।

यस समूह ‘ए’ मा बलियो टोली उत्तर कोरिया र साउदी अरब पनि छन् । उत्तर कोरिया एएफसी एसियन कपको च्याम्पियन टिम हो । नेपालले समूह उपविजेताका रूपमा अगाडि बढ्ने लक्ष्य लिएको छ । ३२ राष्ट्रको सहभागिता रहेको छनोटमा ८ समूह रहेका छन् । हरेक समूहका विजेता ८ टोली तथा उत्कृष्ट तीन उपविजेता टोलीले आगामी वर्ष थाइल्यान्डमा हुने यु-२० एसिया कपमा स्थान बनाउने छ ।

दुई हप्ताअघि बङ्गलादेशमा सम्पन्न साफ यु-२० महिला च्याम्पियनसिपमा नेपाल उपविजेता बनेको थियो । अन्तिम खेल बाहेक सबै खेलमा नेपालले उत्कृष्ट प्रदर्शन गरेको थियो तर फाइनलमा बङ्गलादेशविरुद्ध नेपाल ४-० गोल अन्तरले पराजित भयो । यद्यपि नेपालले साफ यु-२० मा भुटानलाई दुई पटक फराकिलो अन्तरले हराएको थियो ।  नेपालले भुटानविरुद्ध पहिलो खेल ६-१ र दोस्रो खेल ८-० गोल अन्तरले जितेको थियो । साउदी अरबको महिला टिमलाई तुलनात्मक रूपमा कमजोर मानिएको छ ।