अखबार नेपाल ट्रेन्डिङ

एजेन्सी: रियल म्याड्रिडलाई हराउँदै बार्सिलोनाले कोपा डेल रेको उपाधि जितेको छ । सेभिलमा भएको खेलमा बार्सिलोनाले ३-२ को जित दर्ता गरेको हो । निर्धारित ९० मिनेटको खेल २-२ मा सकिएपछि थप ३० मिनेटको खेल हुँदा कुन्डेले दोस्रो हाफमा गोल गरे ।

खेल अवधिभर नै पकड जमाएको बार्साले पहिलो हाफमै पेड्रीको गोलमा अग्रता लिएको थियो । २८औं मिनेटमा लामिन यमलको पासमा पेड्रीले पेनाल्टी क्षेत्र बाहिरबाट उत्कृष्ट गोल गरेका थिए । रियल म्याड्रिडले किलियन एमबाप्पेको आगमनपछि खेलमा पुनरागमनको संकेत दिएको थियो । उनले ७०औं मिनेटमा फ्रिकिक मार्फत गोलमा परिणत गर्दै खेल बराबरीमा ल्याए । त्यसको ८ मिनेटपछि ओरेलिएन चुआमेनीले आर्डा गुलरको कर्नरमा हेडर गोल गर्दै रियललाई अघि बढाए ।

खेलको ८४औं मिनेटमा बार्साले खेल पुन: बराबरीमा ल्यायो । यमलको लामो पासलाई फेरान टोरेसले नियन्त्रणमा लिँदै गोलरक्षकलाई बिट गरेर गोल गरे । इन्ज्युरी समयमा रेफ्रीले बार्सिलोनालाई पेनाल्टी दिएपनि भारको सहयोगमा निर्णय उल्टियो । यस जितसँगै बार्सिलोनाले सिजनको अर्को ट्रफी जितेको छ । क्लबले यसअघि स्पेनिस सुपर कप पनि जितिसकेको छ । क्लबले अब दुई सातापछि रियल म्याड्रिडकै सामना गर्दा स्पेनिस लिगको पनि छिनोफानो हुनेछ । प्रशिक्षक हान्सी फ्लिकको आगमनपछि बार्साले सिजनको तीनै एल क्लासिकोमा जित दर्ता गरेको छ । बार्सिलोनाले च्याम्पियन्स लिगको सेमिफाइनलमा इन्टर मिलानको सामना गर्दैछ ।