अखबार नेपाल ट्रेन्डिङ

काठमाडौं: हङकङमा जारी चार देशीय टी-२०आई सिरिजमा नेपालले विजयी सुरुवात गरेको छ । आफ्नो पहिलो खेलमा नेपालले कतारलाई ८ विकेटले पराजित गरेको हो ।

यो जितसँगै नेपालले दुई अंक बटुलेको छ । अब नेपालले बिहीबार दोस्रो खेल कुवेतसँग खेल्नेछ । कतारले प्रस्तुत गरेको १५२ रनको लक्ष्य पछ्याएको नेपालले १७ ओभरमा २ विकेट गुमाउँदै १५४ रन बनायो । नेपालका ओपनर कुशल भुर्तेलले सर्वाधिक ३८ रन बनाए । १९ बल खेलेका उनले ४ चौका र ३ छक्का प्रहार गरे । अर्का ओपनर आसिफ शेखले २१ बलमा ४ चौकासहित ३३ रन बनाए । कप्तान रोहित पौडेलले ३७ र बसीर अहमदले ३० रन बनाए । यी दुवै ब्याटर अविजित रहे ।

कतारका मुजीब उल रहमानले दुई विकेट लिए । तीन ओभर बलिङ गरेका उनले १२ रन खर्चिए । त्यसअघि मिसन रोड मैदानमा टस हारेर पहिला ब्याटिङ थालेको कतारले निर्धारित २० ओभरमा पाँच विकेट गुमाउँदै १५१ रनको योगफल तयार गरेको थियो । कतारका कप्तान इक्रामुल्लाह खानले सर्वाधिक ५४ रन बनाए । ५४ बल नै खेलेका उनले ५ चौका र २ छक्का प्रहार गरे । शाहजैब जमिल २१ बलमा ४ चौकासहित ३१ रनमा ललितनारायण राजवंशीबाट क्याच आउट भए । अरुमुगगणेश नागराजन १३ रनमा आउट हुँदा मुजीब उल रहमान २० र मोहम्मद इर्शाद १८ रनमा अविजित रहे । नेपालका करण केसी, सोमपाल कामी, नन्दन यादव, गुल्सनकुमार झा र ललितनारयण राजवंशीको नाममा समान एक विकेट रह्यो ।