अखबार नेपाल ट्रेन्डिङ

काठमाडौं: तेस्रो संस्करणको केपी ओली कप फुटबल प्रतियोगिताको उपाधिका लागि आज साविक विजेता मछिन्द्र एफसी र विभागीय टोली त्रिभुवन आर्मी एफसीबीच प्रतिस्पर्धा हुँदैछ । दशरथ रंगशालामा आर्मीले साविक विजेता मच्छिन्द्रलाई हराउँदै च्याम्पियन बन्ने दाउमा हुनेछ ।

आर्मीले यसको पहिलो खेलमा नेपाल पुलिस क्लबलाई २-० ले र सेमिफाइनललाई संकटालाई २-१ ले हराएको थियो । मच्छिन्द्रले पहिलो खेलमा भुटानको ट्रान्सपोर्ट युनाइटेड १-० ले सेमिफाइनलमा आयोजक केपी ओली एफसी ४-० लाई हराएको थियो ।

आइतबार पत्रकार सम्मेलन गर्दै दुवै टोलीका कप्तान र प्रशिक्षकले फाइनलका लागि टिम पूर्ण रूपमा तयार भएको जनाएका छन् । विभागीय आर्मीका प्रशिक्षक मेघराज केसीले दुवै टोली राम्रो भएकाले फाइनलमा पुगेको बताए ।

फाइनल खेलअघि साङ्गीतिक प्रस्तुति हुनेछ । राष्ट्रिय युवा सङ्घ नेपालले आयोजना गरेको प्रतियोगिताका विजेताले १५ लाख ११ हजार १११ रुपियाँ प्राप्त गर्ने छ । उपविजेताले पाँच लाख रुपैयाँ पाउने छ । उत्कृष्ट खेलाडीलाई एक लाख तथा विधागत उत्कृष्टलाई ५० हजार पुरस्कार पाउने छन् ।

आज प्रमुख अतिथि बुफन

विश्वकप विजेता इटालीका पूर्वकप्तान तथा गोलकिपर जियानलुइजी बुफन नेपाल आएका छन् । राष्ट्रिय युवा सङ्घ नेपालको आयोजनामा भइरहेको तेस्रो संस्करणको केपी ओली कप फुटबलको फाइनलमा प्रमुख अतिथिका रूपमा सहभागी हुन उनी आएका हुन् । उनले नेपाल विश्वको उत्कृष्ट देश रहेका  भन्दै आफू र श्रीमतीको नेपाल भ्रमण स्मरणीय हुने बताए । उनले आयोजकलाई धन्यवाद दिए ।

सन् २००६ को फिफा विश्वकप जित्नुभएका बुफनले इटालीका लागि १७६ अन्तर्राष्ट्रिय खेल खेलेका छन् । सन् २००६ को विश्वकपको उपाधि जित्दा उनको भूमिका महत्वपूर्ण थियो । टाइब्रेकरमा पुगेको सो खेलमा इटालीले फ्रान्सलाई ५-३ ले हराएको थियो ।