अखबार नेपाल ट्रेन्डिङ

काठमाडौं: कप्तान अन्जन विष्टको उत्कृष्ट दुई गोलको मद्दतले न्यू रोड टिम एनआरटीले फ्रेन्ड्स क्लबलाई ३-१ गोल अन्तरले पराजित गर्दै  सभापति कपको सेमिफाईनलमा प्रवेश गरेको छ ।

दशरथ रंगशालामा आइतबार सम्पन्न चौथो क्वाटरफाइनलमा एनआरटीका लागि कप्तान अन्जनले दुई गोल र रिचार्ड विल्सनले एक गोल गरे । फ्रेन्ड्सका लागि विवेक पौडेलले सान्त्वना गोल फर्काए । पहिलो हाफमा एनआरटीका लागि कप्तान अन्जनले २३औं मिनेटमा एन्जल महर्जनको पासमा पेनाल्टी क्षेत्रभित्रबाट गोल गर्दै टिमलाई अग्रता दिलाए ।

त्यसको पाँच मिनेटपछि अन्जनले व्यक्तिगत दोस्रो गोल गरे । कृतिश रत्न छुन्जुको क्रसलाई अन्जनले हेडरमार्फत उत्कृष्ट गोलमा परिणत गरे । दोस्रो हाफको सुरुवातमै रिचार्ड विल्सनले एनआरटीलाई ३-० को अवस्थामा पुर्‍याए ।

नेपाली काँग्रेस लोकतान्त्रिक खेलकुद संघ महाधिवेशन निर्देशन समितिको आयोजनामा भएको सभापति कप फुटबल प्रतियोगिताको विजेताले नगद २६ लाख रुपैयाँ पाउने छ भने उप विजेता टोलीले १३ लाख नगद रुपैयाँ पाउनेछ । यसैगरी प्रत्येक खेलमा प्लेयर अफ दी म्याचले १५ हजार रुपैयाँ पाउने छन् । लामो समयदेखि रङ्गशालामा शीर्ष क्लबका खेलहरू नभइरहेका बेला सभापति कप आयोजना हुनुलाई खेलाडी एवं खेल समर्थकमा भने उत्साह थपिएको छ ।