अखबार नेपाल ट्रेन्डिङ

काठमाडौं: आइसीसी यू-१९ महिला टी-२० विश्वकप क्रिकेट प्रतियोगितामा नेपालले डेब्यू खेलमा बंगलादेशसँग ५ विकेटले पराजित भएको  छ ।

शनिबार मलेसियाको बांगीमा भएको खेलमा नेपालले दिएको ५३ रनको सामान्य लक्ष्य बंगलादेशले १३.२ ओभरमा ५ विकेट गुमाएर भेट्टायो । बंगलादेशका लागि सदिया इस्लामले सर्वाधिक १६ रन बनाए भने कप्तान सुमैया अक्तरले १२ रन जोडिन् । नेपालकी रचना चौधरी, रिया शर्मा, सिमाना केसी र पूजा महतोले एक एक विकेट लिए ।

यसअघि टस हारेर पहिला व्याटिङमा तानिएको नेपाल १८.२ ओभरमा अलआउट हुँदै ५२ रनमा समेटिएको थियो । नेपालका लागि सना प्रविनले सर्वाधिक १९ रन बनाइन् । सिमाना केसीले १० रन बनाउनुबाहेक अरू खेलाडीले दोहोरो अंकमा रहन बनाउन सकेनन् । एलिसा यादव ४, तिर्सना विश्वकर्मा ३, कप्तान पूजा महतो २ , किरण कुवँर र सावित्रि धामी १/१ रनमा आउट भए । अनु कडायत र सोनी पाख्रिन शून्यमा पभेलियन फर्किए ।

गत डिसेम्बरमा मलेसियामै भएको यू-१९ एसिया कपमा नेपाल बंगलादेशसँग नै हारेको थियो । विश्वकपमा नेपालसहित १६ राष्ट्रको सहभागिता छ । नेपालले माघ ७ गते स्कटल्याण्डसँग र माघ ९ गते अष्ट्रेलियासँग खेल्नेछ । अष्ट्रेलिया र बंगलादेश दुबै नेपाल भन्दा बलिया टिम हन् ।