अखबार नेपाल ट्रेन्डिङ

एजेन्सी: म्यानचेस्टर सिटीले इंग्लिस प्रिमियर लिगको नयाँ सिजनमा विजयी सुरुवात गर्ने क्रममा जारी छ । सिटीले चेल्सीको घरेलु मैदान स्टामफर्ड ब्रिजमा चेल्सीमाथि २-० गोल अन्तरको सहज जित दर्ता गरेको हो ।

सिटीको जितमा नर्वेली फरवार्ड एर्लीङ हालान्ड र चेल्सीकै पूर्व खेलाडी माटियो कोभाचिचले १-१ गोल गरे । सिटीका लागि हालान्डले १८औं मिनेटमा सुरुवाती अग्रता दिलाएका थिए । खेलको ८४ औं मिनेटमा कोभाचिचले गोल गर्दै जित पक्का गरे । उनले पेनाल्टी क्षेत्र बाहिरबाट सुन्दर गोल गरेका थिए । चेल्सीका लागि भने नयाँ सिजनको सुरुवात सुखद रहन सकेन ।

चेल्सीले नयाँ सिजनका लागि ११ खेलाडी अनुबन्ध गर्ने क्रममा १८५ मिलियन पाउण्ड खर्च गरिसकेको छ । क्लबमा ४० सिनियर खेलाडी रहँदा अब अन्तिम २५ टोलीमा को रहन्छन् भन्ने चासोको साथ हेरिएको छ । सिटीले जितका साथ ३ अंक जोडेको छ । आइतबार नै ब्रेन्टफर्डले नयाँ सिजनमा विजयी सुरुवात गर्ने क्रममा क्रिस्टल प्यालेसलाई २-१ ले पराजित गरेको थियो ।