अखबार नेपाल ट्रेन्डिङ

ललितपुर: एएफसी च्यालेन्ज लिग फुटबलको प्लेअफका लागि नेपालको शहीद स्मारक ‘ए’ डिभिजन लिग च्याम्पियन चर्च ब्वाइज युनाइटेड क्लबले आफ्नो तयारी पूरा भएको जनाएको छ । शुक्रबार सातदोबाटोस्थित एन्फा कम्प्लेक्समा पत्रकार सम्मेलन गर्दै च्यालेन्ज लिगको प्लेअफका लागि टोली तयारी रहेको क्लबले जनाएको छ ।

चर्च ब्वाइजले दशरथ रंगशालामा आगामी साउन २९ गते भुटानको लिग च्याम्पियन पारो एफसीको सामना गर्दैछ । खेल साँझ ६ बजे शुरु हुनेछ । क्लबका अध्यक्ष रुबेन राईले लामो समयपछि नेपालमा अन्तर्राष्ट्रिय स्तरको खेल आयोजना हुनु गौरवको विषय भएको बताए । धेरै पछि दशरथ रंगशालामा हुन लागेकाले यसमा दर्शकको उपस्थिति उल्लेख्य रहने उनको विश्वास छ ।

क्लबका प्रशिक्षक बालगोपाल महर्जनले एएफसी च्यालेन्ज लिगको प्ले अफका लागि आफ्नो तवरबाट तयारी पूरा भएको बताएका छन् । साउन १ गते प्रशिक्षण थालेको टिमले छोटो समयमै राम्रो तयारी गरिरहेको उनले बताए । उनले विपक्षी भुटानी टोली पारो एफसी पनि उत्तिकै राम्रो भएकाले सो खेल प्रतिस्पर्धात्मक हुने बताए ।

प्रतियोगितामा छनोट भए चर्च ब्वाइजले न्यूनतम १ लाख अमेरिकी डलर प्राप्त गर्नेछ । सो खेलका लागि रंगशालाको साधारण प्यारापिटतर्फको टिकट २०० र भीआईपी प्यारापिटको ५०० रुपैयाँ निर्धारण गरिएको छ । चर्च ब्वाइज अनन्त तामाङको कप्तानी र एरिक विष्टको उपकप्तानीमा २३ सदस्यीय टोली घोषणा गरेको छ ।

चर्च ब्वाइजको टोलीः

गोलरक्षक: दीप कार्की, टिकेन्द्र थापा, रेम्बोकुमार चौधरी

डिफेण्डर: अनन्त तामाङ (कप्तान), करिम ओमोलाजा नुरेन, योगेश गुरुङ, सनिश श्रेष्ठ, एकराज बुढाथोकी, सौभाग्य राई, छिरिङ लामा ।

मिडफिल्डर: एरिक विष्ट (उपकप्तान), पिटर बान्डा, सन्तोष खत्री, विवेक पौडेल, रोहन कार्की, लकेन लिम्बु, मनिष झर्गा ।

फरवार्ड: अञ्जन विष्ट, आयुश घलान, मासेस ग्याबह ट्वाम, निरज चौधरी, सञ्जीव विष्ट, आदित्य शाक्य ।