अखबार नेपाल ट्रेन्डिङ

एजेन्सी: जारी आइसिसी टि-२० विश्वकप अन्तर्गत आईतबार विहान भएको खेलमा अष्ट्रेलियाले स्कटल्यान्डलाई हराएपछि इङ्ल्यान्ड सुपर ‘एट’ मा प्रवेश गरेको छ ।

अष्ट्रेलियाले स्कटल्यान्ड माथि ५ विकेटको जित निकालेसँगै इङ्ल्यान्ड नेट रन रेटका आधारमा स्कटल्यान्डभन्दा अगाडि रहँदै अन्तिम आठमा स्थान पक्का भएको हो । गएराति अर्को खेलमा इङ्ल्यान्डले डकवर्थ लुइसका आधारमा नामिबियालाई ४१ रनले पराजित गरेको थियो । सो नतिजापछि सुपर एट पुग्न इङ्ल्यान्डका लागि अष्ट्रेलियाको जित आवश्यक थियो । अन्तिम ओभरसम्म पुगेको खेलमा अष्ट्रेलियाले जित हासिल गर्यो ।

अष्ट्रेलियाले समूह ‘बी’मा सबै ४ खेल जित्दै शीर्ष स्थानमा रह्यो । इङ्ल्यान्ड र स्कटल्यान्ड दुवैको ५-५ अंक भएपनि इङ्ल्यान्ड नेट रन रेटमा अघि रहँदै दोस्रो चरणमा प्रवेश गर्यो । स्कटल्यान्डले दिएको १८१ रनको लक्ष्य अष्ट्रेलियाले २ बल बाँकी छँदा पूरा गरेको थियो । अष्ट्रेलियाको जितमा ट्राभिस हेडले ४९ बलमा ५ चौका र ४ छक्का सहित सर्वाधिक ६८ रन बनाए । मार्कस स्टोईन्सले २९ बलमा ९ चौका र २ छक्का सहित ५९ रन जोडे । टिम डेविड २४ रनमा अविजित रहे ।स्कटल्यान्डका मार्क वाट र सफ्यान शरिफले २-२ विकेट लिए ।

त्यसअघि टस हारेर ब्याटिङ गरेको स्कटल्यान्डले ५ विकेटको क्षतिमा १ सय ८० रन बनाएको थियो । स्कटल्यान्डका ब्रेन्डन मकमलनले ३० बलमा सर्वाधिक ६० रन बनाए । रिचि बेरिङटनले ४२ तथा जर्ज मुन्सीले ३५ रन जोडे ।अष्ट्रेलियाका लागि ग्लेन म्याक्सवेलले २ तथा एस्टन एगर, नेथन एलिस र एडम जाम्पाले १-१ विकेट लिए ।