अखबार नेपाल ट्रेन्डिङ

काठमाडौं: एसिसी यू-१९ प्रिमियर कपको पहिलो खेलमा नेपालले इरानसँग खेल्ने भएको छ । अर्को महिना मलेसियामा हुने प्रतियोगिताबाट शीर्ष तीन टोलीले डिसेम्बरमा हुने यू-१९ एसिया कप खेल्न पाउनेछन् ।

उपाधि दाबेदार नेपालले अक्टोबर १२ मा इरानसँग खेल्नेछ । त्यस्तै अक्टोबर १५ मा बहराइनसँग खेल्नेछ । अक्टोबर १९ मा नेपालले साउदी अरेवियासँग खेल्नेछ । प्रतियोगितामा १६ एसोसिएट टोलीलाई चार समूहमा विभाजन गरिएको छ ।

हरेक सममूहका शीर्ष टोली सेमिफाइनल खेल्नेछन् । सेमिफाइनल अक्टोबर २२, फाइनल र तेस्रो स्थानको लागि अक्टोबर २४ मा प्रतिस्पर्धा हुनेछ । नेपाल फाइनल पुग्ने उच्च सम्भावना छ ।

नेपाली युवा टोलीले दशैको दिन उपाधिको लागि प्रतिस्पर्धा गर्ने सम्भावना उच्च छ । समूह बी मा युएई, ओमान, कतार र चीन छन् । समूह सी मा सिंगापुर, कुवेत, थाईल्यान्ड र माल्दिभ्स छन् । समूह डी मा हङकङ, मलेसिया, जापान र इन्डोनेसिया छन् । नेपालले गत मार्चमा आइसिसी यू–१९ विश्वकप एसिया क्षेत्र छनोटको उपाधि जित्दै विश्वकपमा स्थान बनाएको थियो ।

यू-१९ विश्वकप २०२४ को सुरुवातमा हुनेछ । यू-१९ प्रिमियर कप र एसिया कप विश्वकप अघि नेपाललाई राम्रो तयारी हुनेछ । नेपालले यू१९ प्रिमियर कपको लागि २४ सदस्यीय टोली प्रशिक्षणमा बोलाएको छ ।