नेपाली राष्ट्रिय महिला फुटबल टोली कठिन समूहमा
वि.सं.२०८० साउन १२ शुक्रवार ०८:२४
काठमाडौं: चीनको हान्झोउमा सेप्टेम्बरबाट सुरु हुने १९औं एसियाली खेलकुद अन्तर्गत नेपाली राष्ट्रिय महिला फुटबल टोली कठिन समूहमा परेको छ ।
नेपाल रहेको समूह ‘डी’ मा हाल अष्ट्रेलिया र न्युजिल्यान्डमा जारी फिफा महिला विश्वकप खेलिरहेका दुई टोली जापान र भिएतनामसँगै दक्षिण एसियाली च्याम्पियन बंगलादेश रहेको छ ।
स्वर्ण पदकको दावेदार एवं पूर्व विश्वकप विजेता जापानसँग नेपाल पहिलो पटक अन्तर्राष्ट्रिय खेलमा भिड्न लागेको हो । भिएतनाम र बंगलादेशसँग भने नेपालले यस वर्ष नै खेलिसकेको छ । ओलम्पिक छनोटमा नेपाल र भिएतनामले दुई लेग खेलेका थिए ।
त्यस्तै बंगलादेशसँग साफ च्याम्पियनसिपको फाइनलमा पराजित नेपालले यसै महिना ढाकामा दुई खेलको मैत्रीपूर्ण सिरिज अपराजित रहेर पेनाल्टीमा जितेको थियो । एसियाली खेलकुदको महिला फुटबल स्पर्धामा १७ टोलीको सहभागिता रहनेछ । ५ समूहका शीर्ष टोलीसँगै उत्कृष्ट ३ उपविजेता अर्को चरणमा प्रवेश गर्नेछन् ।
समूह विभाजन यसप्रकार छ :
समूह ‘ए’ – चीन, उज्बेकिस्तान, मंगोलिया
समूह ‘बी’ – चाइनिज ताइपेइ, थाइल्याण्ड, भारत
समूह ‘सी’ – उत्तर कोरिया, सिंगापुर, कम्बोडिया
समूह ‘डी’ – जापान, भिएतनाम, नेपाल, बंगलादेश
समूह ‘ई’ – दक्षिण कोरिया, हङकङ, फिलिपिन्स, म्यानमार
नेपाली टोली पछिल्लो डेढ महिनादेखि प्रशिक्षणमा व्यस्त रहेको छ । एन्फाले आयोजना गरेको अन्तर्राष्ट्रिय मैत्रीपूर्ण खेलमा अनन्तराज थापा प्रशिक्षक रहेपनि एसियाली खेलकुदका लागि भने बालगोपाल महर्जनले टोलीलाई तयारी गराइरहेका छन् । उनीसँग राखेप मुख्य प्रशिक्षक अरुणा गुरुङ र गोलरक्षक प्रशिक्षक श्री प्रकाश वैद्य पनि साथमा छन् ।
प्रशिक्षणमा रहेका २२ खेलाडी:
गोलरक्षक: अन्जिला तुम्बापो सुब्बा, अन्जना राना मगर, उषा नाथ
डिफेन्ड: अमृता जैसी, गिता राना, हिरा कुमारी भुजेल, पुजा राना, विमला विक, निशा ठोकर, समिक्षा घिमिरे
मिडफिल्डर: रेनुका नगरकोटे, सरु लिम्बु, विमला चौधरी,अनिता बस्नेत, प्रीति राई, दिपा शाही
फरवार्ड: सावित्रा भण्डारी, अनिता केसी, सविता राना मगर, रश्मी कुमारी घिसिङ, अमिशा कार्की, रेखा पौडेल
वि.सं.२०८० साउन १२ शुक्रवार ०८:२४