अखबार नेपाल ट्रेन्डिङ

काठमाडौं: नेपाली क्रिकेट टोलीका अलराउन्डर दीपेन्द्रसिंह ऐरी र स्पिनर सन्दीप लामिछानेले २०२३ को ग्लोबल टी-ट्वान्टी क्यानडा खेल्ने भएका छन् ।

सन्दीप लामिछानेलाई सर्रे जगुआरले किनेको छ । सन्दीप भने लगातार यस लिग खेल्दै आएका छन् । गत वर्ष भदौमा बलात्कार आरोप लागेपछि सन्दीप पहिलो पटक विदेशी लिग खेल्न लागेका हुन् ।

दीपेन्द्रलाई मोन्ट्रियल टाइगर्सले ड्राफ्टमा किनेको हो । दीपेन्द्र पहिलो पटक आफ्नो करिअरमा विदेशी लिग खेल्न थालेका हुन् । दीपेन्द्रले टी-ट्वान्टी क्रिकेटमा लगातार उत्कृष्ट प्रदर्शन गर्दै आएका छन् ।

नेपालबाट टी-ट्वान्टी आईमा उनी एक हजार रन पूरा गर्ने पहिलो खेलाडी हुन् । दीपेन्द्रले ४४ टी-ट्वान्टी आई खेलमा एक शतक र पाँच अर्धशतकसहित एक हजार १०३ रन बनाएका छन् ।

बलिङतर्फ २१ विकेट लिएका छन् । नेपाली क्रिकेट टोलीबाट २०१७ देखि दीपेन्द्र पहिलो रोजाईमा खेल्दै आएका छन् । दीपेन्द्रको टोलीमा सकिव अल हसन, आन्द्रे रसेल, क्रिस लिन, पाकिस्तानका मोहम्मद वासिम, युएईका आयन खान लगायतका खेलाडी छन् ।

सन्दीपको टोलीमा इंग्ल्यान्डका एलेक्स हेल्स, पाकिस्तानका इफ्तिखर अहमद, अष्ट्रेलियाका जेसन बेहरनडोर्फ, बंगलादेशका लिटन दास र अफगानिस्तानका करिम जन्नत लगायतका खेलाडी छन् । ग्लोबल टी-ट्वान्टी क्यानडा आगमी जुलाई २० देखि अगष्ट ६ सम्म चल्नेछ ।