लिओनेल मेस्सी अमेरिकी क्लब इन्टर मायमी जाने
वि.सं.२०८० जेठ २५ बिहीवार ०६:०२
एजेन्सी: लिओनेल मेस्सी अमेरिकी क्लब इन्टर मायमी जाने भएका छन् । पेरिस सेन्ट जर्मेन (पिएसजी) छोड्ने घोषणा गरेका उनी मेजर लिग सकर (एमएलएस) क्लब जाने भएका हुन् ।
साउदी क्लब अल हिलालले राखेको प्रस्ताव नकार्दै मेस्सीले अमेरिकी क्लब जाने निर्णय गरेका हुन् । युरोप बाहिर खेल्ने निर्णय लिएका मेस्सीसामु आफ्नो पूर्व क्लब बार्सिलोना फर्कने अवसर पनि थियो । तर मेस्सीले करिअरको अन्त्य अमेरिकी क्लबमा गएर गर्ने भएका हुन् ।
मेस्सीलाई आर्थिक रुपमा निकै ठूलो प्रस्ताव गर्नेमा इन्टर मायमी र अल हिलाल थिए । साउदी क्लबहरुले निकै मोटो रकम खर्च गरिरहेको अवस्थामा मेस्सी पनि त्यसतर्फ जाने चर्चा रहेको थियो ।
मेस्सीले फ्रान्समा दुई सिजन बिताए । सन् २०२१ मा आर्थिक समस्याका कारण बार्सिलोना छोडेका उनले १० पटक ला लिगा र ४ पटक च्याम्पियन्स लिग जितेका थिए । पिएसजीमा भने च्याम्पियन्स लिग जित्ने उनको इच्छा पूरा हुन सकेन ।
वि.सं.२०८० जेठ २५ बिहीवार ०६:०२