अखबार नेपाल ट्रेन्डिङ

काठमाडौं: अखिल नेपाल फुटबल संघ (एन्फा) र असन्तुष्ट ए डिभिजन क्लबबीच शुक्रबार बसेको बैठकले फ्रेन्चाईज फुटबल नेपाल सुपर लिग (एनएसएल) बीचको सम्झौता रद्ध गर्ने निर्णय गरेको छ ।

एनएसएलसँग गरिएको सम्झौताको कतिपय बुँदामा त्रुटि देखिएको निष्कर्ष सहित सम्झौता रद्धका लागि सिफारिस गर्ने निर्णय बैठकले गरेको हो ।

बैठकमा असन्तुष्ट चार क्लब थ्री स्टार, मनाङ मर्स्याङ्दी, संकटा र न्युरोड टिम (एनआरटी) का प्रतिनिधिको उपस्थिति रहेको थियो ।

फुटबलमा कर्पोरेट क्षेत्रको लगानी भित्र्याउने उद्धेश्य सहित चार वर्षअघि एन्फाले चौधरी ग्रुप स्वामित्वको नेपाल स्पोर्टस म्यानेजमेन्ट एण्ड इभेन्ट कम्पनीसँग एनएसएल आयोजनाको औपचारिक सम्झौता गरेको थियो । चार वर्षका लागि गरिएको सम्झौता दोस्रो संस्करण सुरु नहुँदै विवादमा परेको हो ।

एन्फा नेतृत्वमा पंकजबिक्रम नेम्वाङ आए लगत्तै क्लबसँग छलफल गरेर मात्र एनएसएलबारे निर्णय दिने बताएका थिए । सोही अनुसार शुक्रबार एन्फा र असन्तुष्ट क्लब थ्री स्टार, मनाङ, संकटा र एनआरटीको बैठक बस्यो । क्लबहरुको असन्तुष्टिको कारण देखाउँदै एन्फाले एनएसएलसँगको सम्झौता रद्ध गर्ने निर्णय गर्दै कार्यसमितिमा प्रस्ताव लैजाने भएको छ ।