अखबार नेपाल ट्रेन्डिङ

काठमाडौं: काठमाडौं महानगरपालिकाका मेयर बालेन्द्र साह र जनता समाजवादी पार्टीका संघीय परिषद् अध्यक्ष डा. बाबुराम भट्टराईबीच भेटवार्ता भएको छ ।

बालेन अध्यक्ष डा. भट्टराईलाई भेट्न शुक्रवार उनकै निवास टोखा पुगेका थिए ।

मेयर बालेनसँगको भेटको तस्बीर डा. भट्टराईले ट्वीटरमार्फत सार्वजनिक गरेका छन् । उनले मेयर बालेनसँग महानगरपालिकाको समस्या र योजनाबद्ध विकासबारे छलफल भएको जानकारी दिएका छन् ।

उनले ट्वीटरमा लेखेका छन्, ‘काठमाडौं महानगरपालिकाका मेयर बालेन साह र टिमसँग महानगरपालिकाका समस्या र योजनाबद्ध विकासवारे सार्थक विमर्श ! सफलताको हार्दिक शुभकामना !’

काठमाण्डौ मानपा मेयर बालेन शाह र टिमसंग महानगरपालिकाका समस्या र योजनाबद्ध विकासवारे सार्थक विमर्श! सफलताको हार्दिक शुभकामना ! pic.twitter.com/hkmgep6A84

— Baburam Bhattarai (@brb1954) July 8, 2022

बालेन स्वतन्त्र उम्मेदवार भई काठमाडौंको मेयरमा निर्वाचित भएका थिए । मेयरमा निर्वाचित भएलगत्तै उनले सबैजसो प्रमुख राजनीतिक दलका शीर्ष नेताहरूसँग भेटवार्ता गरिसकेका छन् ।

मतगणनाको अन्तिम परिणाम सार्वजनिक नहुँदै उनी नेकपा एमालेका अध्यक्ष केपी ओलीलाई भेट्न बालकोट पुगेका थिए ।

शपथ लिएपछि उनले प्रधानमन्त्री तथा नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लगायतसँग भेटवार्ता गरेका थिए ।

अन्य नेताहरूलाई निर्वाचन सकिएको केही समयमै भेटेका उनी जसपा अध्यक्ष डा. भट्टराईलाई भेट्न भने ढिलो गरी मात्र गएका हुन् ।

निर्वाचन सम्पन्न भएको २ महिना बित्न लाग्दा भट्टराईलाई भेट्न बालेन उनकै निवास पुगेका हुन् ।

केही दिनअघि पूर्व प्रधानमन्त्री भट्टराईले काठमाडौं महानगरपालिकाको मेयरमा स्वतन्त्रबाट जितेका बालेन शाहसँग ‘प्रणाली’ नभएको टिप्पणी गरेका थिए ।