आईसीसी पुरुष टी-२० विश्वकप छनोट अन्तर्गत नेपालले आज फिलिपिन्सविरुद्ध खेल्दै
वि.सं.२०७८ फागुन ७ शनिवार ११:०८
काठमाडौं: आईसीसी पुरुष टी-२० विश्वकप अन्तर्गतको ग्लोबल छनोट ‘ए’ को दोस्रो खेलमा नेपालले आज फिलिपिन्सको सामना गर्दैछ ।
नेपालले अल अमेरात क्रिकेट मैदानमा फिलिपिन्सको सामना गर्नेछ यी दुईबीचको खेल बिहान ११:४५ बजे सुरु हुनेछ ।
छनोटको समूह ‘ए’ मा रहेको नेपाल आज फिलिपिन्सलाई हराउँदै छनोटमा लगातार दोस्रो जित निकाल्न चाहन्छ ।
नेपालले फिलिपिन्ससँग पहिलो पटक खेल्न लागेको हो ।
नेपालले शुक्रबार भएको पहिलो खेलमा ओमानलाई ३९ रनले हराएको थियो ।
नेपाल २ अंक जोडेर तालिकाको दोस्रो स्थानमा रहेको छ ।
फिलिपिन्स भने पहिलो जितको खोजीमा छ ।
पहिलो खेलमा फिलिपिन्स क्यानडासँग पराजित भएको थियो ।
यस्तै नेपालले तेस्रो खेल क्यानाडाविरुद्ध फेब्रुअरी २१ मा खेल्ने तालिका छ ।
समूह चरणको खेलपछि शीर्ष दुई टोली दुबै समूहबाट सेमिफाइनलमा प्रवेश गर्नेछन् ।
सेमिफाइनल खेलहरु फेब्रुअरी २२ तारिखमा हुनेछ ।
फाइनल भने फेब्रुअरी २४ तारिखमा हुनेछ ।
फाइनल प्रवेश गर्ने दुबै टोली अष्ट्रेलियामा अक्टोबर १६ देखि नोभेम्बर १३ तारिखसम्म हुने आईसीसी पुरुष टी-२० विश्वकपको लागि छनोट हुनेछन् ।
वि.सं.२०७८ फागुन ७ शनिवार ११:०८