अखबार नेपाल ट्रेन्डिङ

काठमाडौं: सहिद स्मारक ‘ए’ डिभिजन लिग फुटबलमा एनआरटीलाई त्रिभुवन आर्मीले १–० गोल अन्तरले पराजित गरेको छ ।

त्रिपुरेश्वरस्थित दशरथ रंगशालामा आज भएको खेलमा आर्मीको तर्फबाट पहिलो हाफमा खेलको १७औं मिनेटमा मिडफिल्डर दिनेश हेन्जनले गरेको गोल नै निर्णायक बन्यो ।

जितपछि अपराजित आर्मी ८ खेलबाट १४ अंक जोडेर चौथो स्थानमा यथावत रहेको छ ।

समान १४ अंक रहेपनि आर्मी संकटासँग पछि परेको छ ।

लिगमा दोस्रो हार बेहोरेको एनआरटी १० अंकसहित सातौ स्थानमा यथावत रहेको छ ।

यसैबीच ‘ए’ डिभिजन लिग फुटबल अन्तर्गत पोखरा रंगशालामा भएको खेलमा मनाङ मर्स्याङ्दी क्लबले च्यासल युथ क्लबलाई ५-० गोल अन्तरले शानदार जित निकालेको छ ।

मनाङलाई जित दिलाउन आफिज ओलावालेले ह्याट्रिक गोल गरे । यस्तै एडिलाजा सोमिडे र दिनेश राजवंशीले एक एक गोल गरे ।

मनाङले पहिलो हाफमै दुई गोल गरेको थियो । तेस्रो मिनेटमा सोमिडेले गोल गर्दै मनाङलाई सुरुआती अग्रता दिलाएका थिए ।

खेलको ४३ औं मिनेटमा ओलावालेले गोल गरेपछि मनाङ पहिलो हाफमा २-० ले अघि रह्यो  ।

खेलको ८६ औं मिनेटमा दिनेशले गोल गर्दै मनाङलाई ३-० को अग्रता दिलाए ।

खेलको अतिरिक्त समयको तेस्रो मिनेटमा ओलावालेले व्यक्तिगत दोस्रो गोल गर्दै मनाङलाई ४-० को अग्रता दिलाए ।

त्यसको एक मिनेटपछि नै ओलावालेले ह्याट्रिक पूरा गर्दा मनाङ ५-० ले विजयी भयो ।

जितसँगै मनाङले ८ खेलमा १९ अंक जोडेको छ । मनाङ दोस्रो स्थानमा यथावत रहेको छ ।

च्यासलले ८ खेलमा ५ अंक जोडेको छ । च्यासल लिगको १३ औं स्थानमा रहेको छ ।