अखबार नेपाल ट्रेन्डिङ

काठमाडौं: युवा तथा खेलकुद मन्त्री महेश्वर गहतराजले राष्ट्रिय खेलकुद परिषद् (राखेप)मा ८ जना नयाँ बोर्ड सदस्य नियुक्त गरेका छन् ।

तत्कालिन केपी शर्मा ओली नेतृत्वको सरकारमा मनोनित ९ जना बोर्ड सदस्यलाई मंसिर ३ गते पदमुक्त गर्ने निर्णय गरेका गहतराजले माओवादी केन्द्रमा आबद्ध खेलकर्मीलाई समेट्दै ८ जना बोर्ड सदस्य नियुक्त गरेका छन् ।

मन्त्री गहतराजले परिषद् अध्यक्षको हैसियतामा बिहीबारको निर्णय अनुसार विज्ञको रुपमा लामा पेमा डोल्मा र जनक प्रसाद बर्तौलालाई नियुक्त गरेका छन् ।

मन्त्री गहतराजले मंसिर ३ गते ९ जना बोर्ड सदस्यलाई सोधिएको स्पष्टिकरण चित्त बुझ्दो नभएको भन्दै पदमुक्त गर्ने निर्णय गरेका थिए ।

पदमुक्त भएका मध्य ५ जना बोर्ड सदस्यले उच्च अदालतमा रिट निवेदन दायर गरेका थिए ।

खेलकुद विकास ऐनको दफा ३ को उपदफा २ को ठ मा खेल विज्ञ, खेलकुद प्रशिक्षक, खेलकुद प्राविधिक वा एन्टिडोपिङ विज्ञमध्यबाट अध्यक्षले एक महिला सहित दुई जना मनोनित गर्न पाउने व्यवस्था छ । सोही अनुसार फुटबलकी डोल्मा र तेक्वान्दोका बर्तौला मनोनित भएका हुन् ।

उद्योग वाणिज्य महासंघको प्रतिनिधित्व हुने गरि बर्दियाका दिपेन्द्र विष्ट र शाहसीक तथा पर्यटकीय खेलकुद महासंघबाट प्रतिनिधित्व हुने गरि मोहमद फाजिललाई बोर्ड सदस्यमा मनोनित गरिएको छ ।

यस्तै, खेलकुद संघको सिफारिसमा श्रीमान थापा मगर, अन्जन धमला, बिना श्रेष्ठ, प्रकाशकुमार कुसारीलाई मनोनित गरिएको छ ।

खेलकुद संघको सिफारिसमा अझै एक महिला मनोनित हुन बाँकी छ ।

मनोनित भएका प्रकाशकुमार कुसारी लटार्डो युनिभर्सल संघबाट आएका हुन् भने बिना नवाछे श्रेष्ठ एथ्लेटिक्स संघ, अन्जन धमला र श्रीमान थापा मगर तेक्वान्दो महासंघबाट रहेका छन् ।

मनोनित बोर्ड सदस्यले शुक्रबार बिहानै पद तथा गोपनियताको शपथ लिएका छन् ।