अखबार नेपाल ट्रेन्डिङ

काठमाडौं: आइसिसी महिला टि-२० विश्वकप एसिया क्षेत्र छनोटमा नेपालले आज हङकङसँग खेल्दै छ ।

यी दुईबीचको खेल नेपाली समय अनुसार मध्यान्ह ११:१५ मा युएईको आइसिसी एकेडेमी दुबईमा सुरु हुनेछ ।

उपाधि दाबेदार नेपाल कमजोर हङकङमाथि सहज जितका साथ विजयी सुरुवात गर्न चाहन्छ । हङकङले भने नेपाललाई हराउँदै अघिल्लो चरणको सम्भावना बलियो बनाउने सोचमा छ ।

६ टोली सम्मिलित यस प्रतियोगिताको विजेताले २०२२ मा हुने महिला टि-२० ग्लोबल छनोटमा स्थान बनाउनेछन् ।

नेपाली महिला क्रिकेट टोलीले कतारसँग तीन डब्लू टि-२० आई सिरिज खेलेको थियो । उक्त सिरिजमा महिला टोलीले क्लिनस्वीप गरेको थियो ।

कतार भ्रमणमा ओपनर सीता राना मगरले उत्कृष्ट प्रदर्शन गरेकी थिइन् । सीताले कतारसँग पहिलो खेलमा ३९ र तेस्रो खेलमा ८२ रनको अविजित इनिङ खेलेकी थिईन ।

अनुभवी तथा प्रमुख खेलाडी सीताको उच्च लय नेपाललाई थप सहज हुनेछ । कतारसँग ईन्दु बर्मा र रुविना क्षेत्री बेलबासेले अर्धशतकीय इनिङ खेलेकी थिइन् ।

नेपाली महिला टोलीले २०१९ को टि-२० विश्वकप एसिया क्षेत्र छनोटमा हङकङलाई ४ विकेटले हराएको थियो । त्यसपछि नेपाल र हङकङको भेट भएको छैन ।