राष्ट्रिय फुटबल टोलीका मुख्य प्रशिक्षकमा अब्दुल्लाह अलमुताइरी
वि.सं.२०७७ चैत २२ आइतवार २०:०२
काठमाण्डौ: अखिल नेपाल फुटबल सङ्घ (एन्फा) ले कुवेतका अब्दुल्लाह अलमुताइरीलाई नेपाली राष्ट्रिय फुटबल टोलीका मुख्य प्रशिक्षकमा नियुक्त गरेको छ ।
एन्फाले आइतबार एक कार्यक्रमको आयोजना गरेर अलमुताइरीलाई मुख्य प्रशिक्षकको जिम्मेवारी दिएको घोषणा गरेको हो ।
काठमाण्डौमा सम्पन्न त्रिदेशीय फुटबल कपमा नेपाललाई उपाधि दिलाएका प्रशिक्षक बालगोपाल महर्जनलाई प्रतिस्थापन गर्दै एन्फाले अलमुताइरीलाई नेपाली राष्ट्रिय फुटबल टोलीका मुख्य प्रशिक्षकको रूपमा नियुक्त गरेको हो ।
नेपालले त्रिदेशीय कपमा उचालेको उपाधिले नेपाली समर्थकलाई धेरै खुसी दिए जस्तै आउँदा दिनमा नेपाली समर्थकलाई खुसी दिलाउन मेहनत गर्ने नवनियुक्त प्रशिक्षक अलमुताइरीले बताए ।
आइतबार नियुक्ति पाएका ४० वर्षीय अलमुताइरीले कम्तीमा एक वर्षका लागि नेपाली टोलीलाई हेर्नेछन् ।
यस अवधिमा उनले कम्तीमा विश्वकप छनोट र साफ च्याम्पियनशिपमा नेपाली टोलीको नेतृत्व लिनेछन् ।
अन्तर्राष्ट्रिय फुटबल महासङ्घ (फिफा) र एसियाली फुटबल महासङ्घ ९एएफसी० ले राष्ट्रिय टोलीका प्रशिक्षक हुन प्रो–लाइसेन्स अनिवार्य गरेपछि अलमुताइरीको नेपाली फुटबलमा प्रवेश भएको हो ।
नेपाल आएका अलमुताइरीले नेपाली फुटबललाई दक्षिण एसियामा बलियो बनाउन आफूले सक्दो मेहनत गर्ने बताए ।
कतार फुटबल सङ्घसँगको सहकार्यमा अलमुताइरी नेपाल आएका हुन् ।
उनको पारिश्रमिक कतारी फुटबल सङ्घले बेहोर्नेछ भने नेपाल बसाइको खर्च एन्फाले बेहोर्नेछ ।
त्रिदेशीय कपको उपाधि जिताएका प्रशिक्षक बालगोपाल महर्जनलाई एन्फाले प्रो–लाइसेन्सका लागि कतार पठाउने निर्णय गरेको प्रवक्ता किरण राईले जानकारी दिए ।
यो पनि पढ्नु होस्
https://www.akhabarnepal.com/%e0%a4%ae%e0%a5%8b%e0%a4%ab%e0%a4%b8%e0%a4%b2%e0%a4%95%e0%a5%88-%e0%a4%9a%e0%a4%b0%e0%a5%8d%e0%a4%9a%e0%a4%bf%e0%a4%a4-%e0%a4%86%e0%a4%b9%e0%a4%be-%e0%a4%b0%e0%a4%be%e0%a4%b0%e0%a4%be-%e0%a4%97/
वि.सं.२०७७ चैत २२ आइतवार २०:०२