अखबार नेपाल ट्रेन्डिङ

काठमाडौं: पहिलो चरणका दुई खेलमा गोलविहीन रहँदै नेपाल थ्री नेसन्स कप अन्तर्राष्ट्रिय फुटबल प्रतियोगिताको फाइनलमा पुगेको छ ।

पहिलो खेलमा किर्गिस्तान यु-२३ सँग गोलरहितमा रोकिएको नेपाल आज बंगलादेशविरुद्ध पनि बराबरी खेल्दै फाईनलमा प्रवेश गरेको हो ।

दशरथ रंगशालामा भएको आजको खेलमा दुवैतर्फबाट गोलका लागि केही अवसर सिर्जना भएपनि फिनिसिङमा चुक्दा गोल हुन सकेन ।

आक्रामक शैलीमा प्रस्तुत भएको नेपालका लागि २१औं मिनेटमा त्रिदेव गुरुङको क्रसमा अञ्जन विष्टले १८ यार्ड बक्स भित्रबाट प्रहार गरेको हेडर क्रसबारमाथिबाट बाहिरिएको थियो ।

नेपाली रक्षापंक्तिलाई व्यस्त राखेको बंगलादेशका फरवार्ड राकिब होसेनमाथि ३९औं मिनेटमा खराब फाउल गरेका संजोग राईले पहेँलो कार्ड पाएका थिए ।

सोही फाउलमा पाएको फ्रि किकमार्फत बंगलादेशका कप्तान जमल भुयाको प्रहार पोस्टको नजिकबाट बाहिर गएको थियो ।

विपक्षी खेलाडीमाथि फाउल गरेका नेपाली डिफेन्डर रन्जित धिमालले पनि ४४औं मिनेटमा पहेँलो कार्ड पाएका थिए ।

निकै नै प्रतिस्पर्धात्मक खेलमा दोस्रो हाफको ५४औं मिनेटमा बंगलादेशी कप्तानले ४० यार्ड टाडाबाट प्रहार गरेको फ्रि-किक नेपालका कप्तान तथा गोलकिपर किरण चेम्जोङले सहजै बचाउ गरेका थिए ।

त्यसको पाँच मिनेट नबित्दै नेपालका लागि सब्टिच्युट खेलाडी सुनिल बलले पेनाल्टी एरियाभित्र दिएको पासलाई अञ्जनले सदुपयोग गर्न नसक्दा नेपालले अग्रता लिने सुन्दर मौका गुमाएको थियो ।

अञ्जनले गरेको फितलो प्रहार बंगलादेशका गोलकिपर मोहम्मद सहिदुल आलमले सहजै रोकेका थिए ।

पहिलो खेलमा किर्गिस्तान यु २३ लाई १-० ले पराजित गरेको बंगलादेश एक खेल अगावै फाइनलमा पुगिसकेको छ ।

दुई खेलमा दुई अंक जोडेको नेपाल पहिलो चरणबाट दोस्रो स्थानमा रहँदै फाइनलमा पुगेको हो ।

राउन्ड रोबिन पद्धतिमा जारी प्रतियोगिताको सोमबार हुने फाइनलमा नेपाल र बंगलादेश नै आमनेसामने हुनेछन् ।

नेपाल, बंगलादेश र किर्गिस्तान यु-२३ सहभागी प्रतियोगिता राउन्ड रोबिन पद्धतिको हो ।

प्रतियोगिताको विजेताले ५ हजार तथा उपविजेताले ३ हजार अमेरिकी डलर प्राप्त गर्नेछन् ।

त्यस्तै, मोस्ट भ्यालुएबल प्लेयरले ५ सय तथा प्लेयर अफ दी म्याचले २ सय ५० डलर प्राप्त गर्नेछन् ।