अखबार नेपाल ट्रेन्डिङ

काठमाडौं: विश्वभर फैलिएको कोरोना भाइरस कोभिड–१९ संक्रमणबाट ज्यान गुमाउनेको संख्या चार हजार नाघेको छ । पछिल्ला दिनमा चिनमा संक्रमणदर घट्दै गएपनि अन्य देशमा भने फैलिइरहेको छ । चिनपछि सबैभन्दा बढि संक्रमण इटालीमा देखिएको छ । अहिलेसम्म संक्रमितमध्ये ६ प्रतिशतको मृत्यु भएको छ ।

गत डिसेम्बरमा चीनको बुहान प्रान्तमा देखिएको यसको संक्रमण सयभन्दा बढी देशमा देखिसकेको छ । पछिल्लो नतिजा अनुसार चीनबाहिर इटालीमा कोरोना संक्रमणका बिरामी धेरै देखिएका छन् । इटालीमा कोरोना भाइरस संक्रमणबाट मृत्यु हुनेको संख्या ४ सय ६३ पुगेको छ । संक्रमितको संख्या एकै दिन २५ प्रतिशतले बढ ९ हजार पुगेको छ । इटाली सरकारले कोरोना फैलिन नदिन यात्राको लागि विशेष अनुमति लिनुपर्ने नियम लगाएको छ । देशभर स्कुल, जिम सेन्टर, संग्रहालय, नाइट क्लब तथा मानिस जम्मा हुने अन्य स्थान बन्द गर्ने घोषणा गरिएको छ ।

फ्रान्समा सांसद पनि कोरोना संक्रमणमा परेका छन् । अमेरिकामा २७ जनाको मृत्य भएको छ भने जापानमा १० जनाले ज्यान गुमाएका छन् । यसैबीच चिनियाँ राष्ट्रपति सी चिनफिङ मंगलबार बिहान कोरोना भाइरस कोभिड–१९ को उदगमस्थल वुहान पुगेका थिए । चिनफिङले त्यहाँ पुगेर स्वास्थ्यकमीहरुसँग पछिल्लो अवस्थाबारे जानकारी लिएका थिए । चीनमा संक्रमित र मृतक संख्या कम हुँदै गएको छ ।

कोरोना प्रकोपका कारण विश्वभर विविध कार्यक्रम स्थगित गरिएका छन् । विभिन्न देशमा खेलकुद र सांस्कृतिक कार्यक्रम पनि रोकिएका छन् । युरोपेली संसद्ले यसै साताका लागि तय गरिएको विस्तारित बैठक अर्को सूचना नभएसम्मका लागि स्थगन गरेको छ । कैयौं देशले कोरोना प्रभावित राष्ट्रका नागरिकलाई प्रवेशमा रोक लगाएका छन् ।