अखबार नेपाल ट्रेन्डिङ

काठमाडौं: महानगरीय ट्राफिक प्रहरी महाशाखाले फागु पर्वलाई लक्षित गरी काठमाडौं उपत्यकामा विशेष सुरक्षा योजना लागु गरेको छ । पर्वलाई दुर्घटनारहित सुरक्षित र मर्यादित बनाउन उपत्यकाको अधिकांश चोक, गल्ली तथा सडकमा सुरक्षा जाँच कडा पारिएको महाशाखाले जनाएको छ ।

महाशाखाका प्रमुख प्रहरी वरिष्ठ उपरीक्षक भिमप्रसाद ढकालले मादक पदार्थ सेवन गरी जथाभावी सवारी चलाउने, मोटरसाइकलमा तीन जना राख्ने, तीव्र गतिमा चलाउने, लापरवाहीका साथ सवारी चलाउने, हेल्मेट नलगाई मोटरसाइकल तथा स्कुटर चलाउने र ठूलो आवाज निकालेर वा मोडिफाई गरी सवारी साधन चलाउनेलाई कारवाही गर्न विशेष जाँचको ब्यवस्था मिलाइएको बताए ।

उपत्यकाका ७६ स्थानमा चेकिङ प्वाइन्ट र १४ वटा मोबाइल भ्यानले गस्ती तथा मोबाइल चेकिङ गरिने छ । नियमित बाहेक थप ट्राफिक प्रहरीहरू तथा मोटरसाइकलमा समेत ट्राफिक प्रहरीहरू गरी जम्मा ५६६ जना ट्राफिक प्रहरी परिचालन गरिएको छ ।

के-के गर्दा प्रहरीले पक्राउ गर्छ त ?

• डोरी टाँगेर वा अन्य प्रक्रियाबाट चन्दा उठाउँदा
• महिला र पर्यटकहरुलाई अभद्र व्यवहार गर्दा
• जथाभावी सार्वजनिक साधन चलाउने, छतमा या हुडमा यात्रा गराउँदा
• सवारीसाधनमा बसेर मादक पदार्थ सेवन गर्दा
• बिना हेलमेट र तीनजना सवार मोटरसाइकल चलाउँदा
• जबर्जस्ती अरुलाई रंग र पानी छ्याप्दा
• जबर्जस्ती अर्काको घरमा गई होली खेल्दा
• चाडपर्वको नाममा जुवातास खेल्दा
• अनुहार नै नचिनिने गरी रंग लगाई हिड्ँदा
• मादक पदार्थ वा लागूऔषध सेवन गरी हो–हल्ला गर्दा
• मादक पदार्थ वा लागूऔषध सेवन गरी झै–झगडा गर्दा