अखबार नेपाल ट्रेन्डिङ

काठमाडौं: संसद सचिवालयकी एक महिला कर्मचारीलाई बलात्कार प्रयासको मुद्दामा पूर्व सभामुख कृष्णबहादुर महराले सफाइ पाएका छन् । काठमाडौं जिल्ला अदालतमा उपस्थित भएका महरा सफाइको फैसलासँगै आफूले न्याय पाएको प्रतिकृया दिएका छन ।

अदालतको आदेशानुसार थुनामुक्त भएका महरालाई कारागारमै कैद सजाय भुक्तान गरिरहेका नेपाल प्रहरीका पूर्वमहानिरीक्षक रमेश चन्द ठकुरी, सशस्त्र प्रहरीका पूर्व डीआईजी रञ्जन कोइराला लगायतले खादा र माला लगाएर बिदाई गरेका थिए ।

मुद्दालाई न्यायाधीश अम्बरराज पौडेलको इजलासले सोमबार फैसला गर्दै महरालाई सफाइ दिएको हो । महराको पक्षबाट रमण श्रेष्ठ, भीमार्जुन आचार्य, शेरबहादुर केसी, लव मैनाली लगायतका ३७ जना अधिवक्ताले बहस गरेका थिए । बलात्कारको प्रयास गरेको आरोपमा महराविरुद्ध जिल्ला अदालत काठमाडौंमा मुद्दा दर्ता भएको थियो । बलात्कारको आरोप लागेपछि महराले असोज १४ गते सभामुखबाट राजीनामा दिएका थिए ।

असोज १९ गते महाअष्टमीका दिन सरकारी निवास बालुवाटारबाट पक्राउ परेका महरालाई काठमाडौं जिल्ला अदालतले कात्तिक १९ गते पुर्पक्षका लागि जेल चलान गराउन आदेश दिएको थियो । ३ महिना २० दिनपछि थुनामुक्त भएका महरा अदालतको फैसलापछि प्रसन्न मुद्दामा शुभेच्छुकसँग खुशी साटेका थिए । उनलाई सत्तारुढ दल नेपाल कम्युनिस्ट पार्टीका कार्यकर्ताले पनि स्वागत गरेका थिए । मुद्दा फैसला भएपछि अदालत परिसरमा शुभेच्छुक तथा नेकपाका नेता कार्यकर्ताको उपस्थिती बाक्लो हुँदै गएपछि भिड नियन्त्रणका लागि प्रहरीले लाठी चार्ज समेत भएको थियो ।