अखबार नेपाल ट्रेन्डिङ

काठमाडौं: संघीय संसद प्रतिनिधिसभाको सभामुख पदमा अग्निप्रसाद सापकोटा निर्विरोध चयन भएका छन् । संसदको बैठकले सापकोटालाई सभामुख पदमा निर्विरोध चयन गरेको हो । नेकपा ससंदीय दलका उपनेता समेत रहेका सुवासचन्द्र नेम्वाङको प्रस्ताव र नेकपा प्रमुख सचेतक देव गुरुङ, नेकपा सांसद ओनसरी घर्ती तथा राजपा सांसद लक्ष्मणलाल कर्णको समर्थनमा सापकोटा निर्विरोध सभामुख बनेका हुन् ।

नवनिर्वाचित सभामुख सापकोटाले आफूले संसदमा रहेका सबै दललाई मिलाएर लैजाने प्रतिक्रिया दिएका छन् । ‘मैले यो पक्ष त्यो पक्ष वा यो दल त्यो दल भनेर अघि बढ्ने छैन’ नवनिर्वाचित सभामुख सापकोटाले भने,‘सबैलाई मिलाएर अघि बढ्ने छु ।’ संसदमा सबैलाई मिलाएर लैजाने जिम्मेवारी अग्नि सापकोटाबाट बहन हुन्छ भन्ने विश्वासका साथ उनलाई सभामुखका रुपमा प्रस्ताव गरेको नेकपाको संसदीय दलका उपनेता सुवास नेम्वाङले बताएका थिए ।

संसदमा आफ्ना धारणा राख्दै प्रमुख प्रतिपक्षी दल नेपाली कांग्रेसमा नेता मिनेन्द्र रिजालले सापकोटाको नाम नलिई आम नागरिकले शंकाको कुरा गरेको भन्दै त्यसलाई शान्त पार्न उनले सक्छन् कि सक्दैनन् भन्ने भोलिका दिनमा व्यवहारल देखाउने बताएका थिए । नवनिर्वाचित सभामुख सापकोटाको पद तथा गोपनीयताको सपथ सोमबार गर्ने तयारी रहेको संसद सचिवालयले जनाएको छ ।