अखबार नेपाल ट्रेन्डिङ

काठमाडौः लगातार तीन दिनदेखि खराब भएको मौसममा आजबाट सुधार आएने मौसम पुर्वानुमान महाशाखाले जनाएको छ । पश्चिमी वायुको प्रभाव कमजोर हुँदै गएकाले आइतबार र सोमबार देशभरकै मौसम सामान्यतया सफा रहने महाशाखाले जानकारी दिएको हो ।

महाशाखाका अनुसार देशको पहाडी भु-भाग लगायत उच्च हिमाली भुभागहरुमा आंशिक बदली रही बाँकी भुभागमा मौसम सामान्यतया सफा रहने छ । काठमाडौंको मौसम पनि सामान्यतया सफा रहने महाशाखाले जनाएको छ । काठमाडौंको आज बिहानको न्यूनतम् तापक्रम ६ डिग्री सेल्सियस रह्यो भने दिउँसोको अधिकतम् तापक्रम १३ देखि १५ डिग्री सेल्सियसबीच रहने महाशाखाले जनाएको छ ।

मौसम खुले पनि बिहान र बेलुका चिसो रही रहने हुनाले चिसोबाट जोगिन हुन महाशाखाले सबैमा अनुरोध गरेको छ । नयाँ मौसमी प्रणाली देखिएकाले मङ्गलबारदेखि भने फेरि मौसम बदली हुने सम्भावना रहेको महाशाखाले जानकारी दिएको छ । केही दिन यता पश्चिमी वायुको प्रभावका कारण देशभर पानी र हिउँ पर्दा जनजीवन प्रभावित भएको थियो ।