अखबार नेपाल ट्रेन्डिङ

काठमाडौं: सरकारले सशस्त्र प्रहरी बलको आईजीपीमा एआईजीपी नारायणदत्त पौडेललाई नियुक्त गरेको छ । नेपाल सरकारका प्रवक्ता एवम् शिक्षा मन्त्री सस्मित पोखरेलले पौडेललाई सशस्त्रको तेह्रौँ आईजीपीमा नियुक्त गरिएको जानकारी दिए ।

सोमबार बसेको मन्त्रिपरिषद् बैठकले अतिरिक्त महानिरीक्षक (एआईजी)पौडेललाई बिदा भएका राजु अर्यालको स्थानमा प्रहरी महानिरीक्षक (आइजिपी) नियुक्त गरेको हो । अर्याल आगामी १८ वैशाखमा ४ वर्षे कार्यकाल पूरा गरेर घर फर्किँदैछन् । नवनियुक्त आईजीपी पौडेल १८ चैत २०५४ मा प्रहरी निरीक्षक पदमा नेपाल प्रहरीमा सेवा प्रवेश गरेका हुन् ।

२०५८ सालमा सशस्त्र प्रहरी बल गठन भएपछि एक पद बढुवा भएर उनी डीएसपीमा समायोजित भए । सशस्त्र महानिरीक्षकमा उनकै ब्याचका एआईजी वंशीराज दाहाल र त्यसपछिका गणेश ठाडा आकांक्षी थिए । तर, बालेन्द्र शाह नेतृत्वको सरकारले वरिष्ठता र ज्येष्ठताका आधारमा पौडेललाई आईजीपी बनाएको हो । पौडेल यसअघि ६ जेठ २०७९ मा एआईजीमा भए । उता दाहाल पौडेलभन्दा ५ महिनापछि असोज २८ मा एआईजी भए ।

अबको प्रहरी नियमावलीमा ३० वर्षे उमेर हद यथावत रहँदा पौडेलको कार्यकाल करिब २३ महिनाको हुने पक्का छ । नियमावलीमा वर्तमान व्यवस्था संशोधन भएर ३२ वर्षे उमेर हद कायम भएमा उनको कार्यकाल थप दुई वर्ष लम्बिने निश्चित छ ।