अखबार नेपाल ट्रेन्डिङ

काठमाडौं: आमनागरिकलाई नेपाली सेनाका विविध गतिविधिहरु नजिकबाट नियाल्ने अवसर प्रदान गर्ने उद्देश्यका साथ सेना दिवस-२०८२ को अवसरमा माघ ४ गतेदेखि ७ गतेसम्म जङ्गी अड्डामा ‘नेपाली सेना फोटो तथा बृहत् प्रदर्शनी-२०८२’ सञ्चालन हुने जानकारी सैनिक जनसम्पर्क तथा सूचना निर्देशनालयले दिएको छ ।

प्रधानसेनापति अशोकराज सिग्देलले एक विशेष कार्यक्रमका बीच ‘नेपाली सेना फोटो तथा बृहत् प्रदर्शनी-२०८२’ को माघ ४  गते उदघाटन गर्नेछन् । प्रदर्शनीमा नेपाली सेनासम्बन्धी विगतदेखि वर्तमानसम्मका गतिविधिहरु झल्कने फोटो, ऐतिहासिक हातहतियार, उपकरण र नेपाली सेनाले निर्वाह गर्दै आएका विभिन्न भूमिकाहरुको सम्बन्धमा प्रदर्शनी गरिने छ ।

‘नेपाली सेना फोटो तथा बृहत् प्रदर्शनी-२०८२’ मा अवलोकनकर्ताहरुलाई माघ ४ गते बिहान ११:३० बजेदेखि बेलुका ५:०० बजेसम्म र माघ ५ गतेदेखि ७ गतेसम्म बिहान १०:०० बजेदेखि बेलुका ५:०० बजेसम्म जङ्गी अड्डाको पश्चिमतर्फको गेटबाट निःशुल्क प्रवेशको व्यवस्था मिलाइएको बताइएको छ ।

प्रदर्शनीमा सैनिक पोशाक, सैनिक ब्याण्ड, सैनिक हवाई सेवा, घोडचढी, राष्ट्रिय निकुञ्ज तथा वन्यजन्तु आरक्ष, शान्ति सेना, विकास-निर्माण, विपद् व्यवस्थापन, खेलकूद, राष्ट्रिय सेवा दलका साथै सैनिक विद्यालयहरु लगायतका विविध गतिविधिहरुको प्रदर्शनी हुनेछ । उक्त प्रदर्शनीबाट आमनागरिकका साथै विभिन्न तहमा अध्ययन गर्ने विद्यार्थीहरुलाई नेपाली सेनाका विभिन्न गतिविधिहरुका बारेमा जानकारी हुने अपेक्षा गरिएको छ ।