मेरो केही दिनको बसाइँमा मैले धेरै कुरा सिकेँ: महासचिव गुटरेस
वि.सं.२०८० कात्तिक १४ मंगलवार १६:४८
1.6K
shares
काठमाडौं: संयुक्त राष्ट्रसंघका महासचिव एन्टोनियो गुटेरेसले नेपालको शान्ति प्रक्रिया टुंग्याउन राष्ट्रसंघले सहयोग गर्ने बताएका छन् । संघीय संसद्को संयुक्त बैठकलाई सम्बोधन गर्ने क्रममा महासचिव गुटेरेसले संक्रमणकालीन न्याय टुंग्याउन नेपाललाई एक्लै सम्भव नभएको भन्दै यसमा राष्ट्रसंघले सहयोग गर्ने बताएका हुन् ।
संयुक्त राष्ट्रसंघका महासचिव एन्टोनियो गुटरेसले नेपाललाई जलवायु परिवर्तनविरुद्ध नेपालको संघर्ष र यहाँको विकासका लागि सहयोग गर्ने प्रतिबद्धता व्यक्त गरेका छन् । सम्बोधनमा महासचिव गुटरेसले नेपाल सरकार र नेपाली जनतालाई आत्मीय स्वागतका लागि धन्यवाद दिए । उनले भने, ‘मेरो केही दिनको बसाइँमा मैले धेरै कुरा सिकेँ । त्यो सिकेको कुरा लिएर जलवायु परिवर्तनमा तपाईंहरुको संघर्षलाई र यहाँको विकासका लागि सहयोग गर्नेछु ।’ गुटरेसले नेपालले लैङ्गिक समानतामा हासिल गरेको प्रगतिको प्रशंसा गरे ।
संसदमा सम्बोधनअघि महासचिव गुटेरेस गौतमबुद्धको जन्मस्थल लुम्बिनी पुगेका थिए । त्यहाँ उनले विश्व शान्तिका लागि अपिल गरेका थिए । धनी तथा औद्योगिक राष्ट्रलाई जलवायु परिवर्तनको असर न्यूनीकरण हुने गरी प्रविधि तथा उपाय अपनाउन आह्वान गर्दै उनले नेपालमा परिहेको जलवायु परिवर्तनको असर न्यूनिकरणका लागि सहयोग गर्न आग्रह गरेका थिए ।
प्रधानमन्त्री पुष्पकमल दाहाल ‘प्रचण्ड’को निमन्त्रणमा महासचिव गुटेरेस शनिबार काठमाडौंका आएका हुन् । सन् २०१७ मा संयुक्त राष्ट्रसंघको महासचिव भएपछि उनी पहिलो पटक नेपाल भ्रमणमा आएका हुन् । महासचिव गुटरेस भोलि स्वदेश फर्कनेछन् ।
वि.सं.२०८० कात्तिक १४ मंगलवार १६:४८




















