अखबार नेपाल ट्रेन्डिङ

काठमाडौं: मेडिकल व्यवसायी दुर्गा प्रसाईंले आफूमाथि कालो मोसो दलिएपछि त्यसको आरोप एमाले अध्यक्ष केपी शर्मा ओली र एमालेकै नेता महेश बस्नेतमाथि आक्रोश पोखेका छन् ।

प्रसाईंले सामाजिक सञ्जाल फेशबुकमा लेखेका छन्:–

हजुरबुबा के पी ओली र कमरेड महेश बस्नेत लगायत सम्पूर्ण एमाले तथा राष्ट्रिय युवा संघ लाई धन्यवाद छ !

तपाईंहरूले दिनुभएको पैंचो नेपाली जनताले छिट्टै फिर्ता गर्ने छ !

प्रतीक्षा गर्नुहोस् !!

प्रसाईंले सोमबार काठमाडौंको जमलमा रहेको होटल यल्लो पकोडामा पत्रकार सम्मेलन गरेका थिए । कार्यक्रम समापन भएर प्रसाईं आफ्नो गाडी चढेर हिँड्ने क्रममा उनलाई कालो मोसो दलिएको थियो । कालो मोसो दल्नेहरुले केपी ओली जिन्दावाद, महेश बस्नेत जिन्दावाद नारा लगाएको कारण प्रसाईंले ओलीको नाम लिएर पैंचो तिर्ने बताएका छन् ।

यता नेकपा एमालेका पोलिटब्यूरो सदस्य तथा पूर्वमन्त्री महेश बस्नेतले कालो मोसो दलिएका मेडिकल व्यवसायी प्रसाईंलाई युवा संघको तागत ननाप्न चेतावनी दिएका छन् । प्रसाईंले एमाले अध्यक्ष केपी शर्मा ओली र महेश बस्नेतको नाम लिएर पैचों तिर्ने चेतावनी दिएका थिए । त्यसको जवाफमा महेश बस्नेतले प्रसाईंलाई युवाहरुले आज तह लगाएको प्रतिक्रिया दिएका छन् ।

बस्नेतले सामाजिक सञ्जाल फेशबुकमा लेखेका छन्:–

बैक तथा बित्तीय संस्थालाई चुनौति दिने, बिभिन्न समुदायलाई देश निकाल्छु , कालोमोसो द्ल्छु भन्ने अपराधिक कर्म गर्ने दुर्गा प्रसाईलाई युवाहरुले आज तह लाएछन । अब सुध्रीउ, अरुलाई दोष नलगाउ । यस्तालाई सरकारले कारवाही गरोस । जन प्रतिरोध हुनु राम्रो होइन । युवा संघको तागत ननाप प्रसाई !

प्रसाई एमाले अध्यक्ष ओली र माओबादी अध्यक्ष प्रचण्डलाई सँगै आफ्नो घर भक्तपुर लगेर मार्सी चामलको भात खुवाएपछि चर्चामा आउँदै मार्सी उपनामले चर्चित भएका भएका थिए ।