अखबार नेपाल ट्रेन्डिङ

काठमाडौं: हङकङबाट आएको सय किलो सुन तस्करी प्रकरणमा त्रिभुवन अन्तर्राष्ट्रिय विमानस्थल भन्सारका कर्मचारीहरुको ठूलो समूह तानिने भएको छ ।

तस्करीको सय किलो सुन पास गराउने काममा भन्सारका चार सिफ्टमा काम गर्ने करिब २० जना कर्मचारी प्रत्यक्ष संलग्न देखिएका भन्सार विभागले तयार गरेको आन्तरिक छानबिन प्रतिवेदन मस्यौदामा उल्लेख छ ।

गत साउन ४ गते विभागले निर्देशक मानबहादुर पौडेलको संयोजकत्वमा गठन गरेको ६ सदस्यीय आन्तरिक छानबिन समितिले प्रतिवदेनको मस्यौदा तयार गरेको तर त्यसलाई पूर्णता दिन बाँकी रहेको विभागका महानिर्देशक शोभाकान्त पौडेलले जानकारी दिए ।

विभागको मुख्य अध्ययन सुन त्यसरी छुट्नुमा मानवीय कमजोरी जिम्मेवार हो कि प्राविधिक त्रुटि भनेर छुट्याउनमा केन्द्रित छ । मानवीय त्रुटि देखिएमा त्यसमा संलग्नहरु मुछिने पक्का हुन्छ ।

तर विभागका महानिर्देशक पौडेलले कतिपय विषयमा मानवीय त्रुटि देखिएकै आधारमा सबैलाई तस्करीमा संलग्न भनेर मुछ्न नहुने बताए । ‘पास गर्ने क्रममा नजानेको हुन पनि सक्छ। त्यो विषय पनि हेर्नुपर्ने हुन्छ । तर अनुसन्धानको लागि भने भन्सार विभागले जुनसुकै हिसाबले पनि सहयोग गर्छ,’ उनले भने ।

साउन २ गते राजस्व अनुसन्धान विभागले भन्सार पास भैसकेको अवस्थामा सय किलो सुन समातेको थियो । सुन पास हुनुमा प्राविधिक नभई मानवीय कमजोरी नै जिम्मेवार देखिएको प्रतिवेदनको निष्कर्ष छ ।

प्रतिवेदनमा भनिएको छ, ‘एक्सरे मेसिनको गल्ती छैन। सुन पास भएको छ। त्यसमा कर्मचारीहरुको जाँच नै कमजोर भएको छ ।’ रेडी ट्रेड प्रालिको प्रज्ञापन पत्रमा ल्याइएको मोटरसाइकलको ब्रेक सुमा सुन ल्याएको थियो ।

प्रतिवेदनमा भनिएको छ, ‘प्रज्ञापन पत्र एजेन्ट यादव पराजुलीको भन्सार एजेन्ट नम्बर ७८२ बाट भरिएको छ । आयातकर्ता रेडी ट्रेड प्रालि उल्लेख छ । निकासीकर्ता जैनमेन एन्टोङ ट्रान्सपोर्टेसन सर्भिस प्रालि हङकङ देखिएको छ ।’

जुलाई १३ मा चलान भएको उक्त सामान भन्सार गोदाममा असार ३० गते आएको देखिएको छ । प्रतिवेदनमा लेखिएको छ, ‘३६ काटन ब्रेक सु आयात भएकोमा असार १० गते ८ काटन जाँच पास भएको र बाँकी गोदममै थियो ।’ उक्त कम्पनीको समान पास गराउन भन्सारका करिब २० जना कर्मचारी संलग्न भएको देखिएको छ ।

‘उक्त कम्पनीको सामान पास गराउन ४ सिफ्टका फरकफरक कर्मचारी प्रयोग भएका छन् । जसमा हस्ताक्षर गर्ने नै १५ जना कर्मचारी छन्। थप ५ जना कर्मचारी संलग्न भएको हुनसक्छ,’ प्रतिवेदनमा उल्लेख छ । राजस्व अनुसन्धान विभागले प्रत्यक्ष संलग्न हुने सबै कर्मचारीहरु पहिलो घेरामा रहेको बताएको छ । जस अनुसार ३ जना कर्मचारी र ३ जना भन्सार एजेन्टलाई पक्राउ गरिसकेको छ ।