अखबार नेपाल ट्रेन्डिङ

काठमाडौं: नवनिर्वाचित प्रतिनिधिसभा सदस्यले यही पुस ७ गते आफूमध्ये ज्येष्ठ सदस्यबाट शपथ लिने भएका छन् । तर, अहिलेसम्म ज्येष्ठ सदस्यकै टुंगो लागेको छैन ।

कानुन अनुसार ७ गते अगावै राष्ट्रपतिसमक्ष शपथ लिइसक्नुपर्ने हुन्छ । निर्वाचन आयोगले सचिवालयलाई निर्वाचित सांसदको उमेर (जन्ममिति)समेतको विवरण उपलब्ध गराएको छ । तर, उक्त विवरणलाई मात्रै आधार नमानेर सचिवालयले सम्भावित ज्येष्ठ सदस्यको विषयमा अध्ययन गरिरहेको प्रवक्ता संघीय संसद् सचिवालयका प्रवक्ता रोजनाथ पाण्डेले बताए ।

यसपटक माओवादीबाट निर्वाचित सांसद यादवको उमेर ८५ रहेको आयोगको विवरणमा छ । यद्यपि, महन्थ ठाकुर, चित्रबहादुर केसी र पशुपतिशमशेर जबरा सबैभन्दा बढी उमेरका सांसद रहेको पाण्डेको भनाइ छ । संघीय संसद्का महासचिव डा. भरतराज गौतमद्वारा सोमबार जारी सूचनामा शपथग्रहण कार्यक्रममा सांसदहरूलाई नागरिकताको प्रतिलिपि, प्रतिनिधिसभा सदस्य पदको प्रमाणपत्रको सक्कल र प्रतिलिपि अनि दुई प्रतिफोटो ल्याउन भनिएको छ। यस्तै, राष्ट्रिय वा आआफ्नो सांस्कृतिक पहिचान झल्कने पोसाकमा उपस्थित हुन आग्रह गरिएको छ ।

संविधानको धारा ८८ मा संघीय संसद्को प्रत्येक सदनका सदस्यले सदन वा त्यसको कुनै समितिको बैठकमा पहिलो पटक भाग लिनुअघि  कानुनबमोजिम शपथ लिनुपर्ने व्यवस्था छ ।

मातृभाषामा शपथग्रहण गर्न चाहने सांसदले तीन दिनअघि नै संसद् सचिवालयमा जानकारी गराउनुपर्ने महासचिव डा. गौतमले जारी गरेको सूचनामा उल्लेख छ ।

राष्ट्रपति विद्यादेवी भण्डारीले आह्वान गरे अनुसार यही पुस १० गतेभित्र नयाँ सरकार बन्नुपर्ने हुन्छ । त्यसअगावै संसद् सचिवालयले सांसदको शपथग्रहण कार्यक्रम राखेको हो ।

सांसदको शपथ भने नयाँ बानेश्नरस्थित संसद् भवनमै हुनेछ । त्यसपछि सांसदहरूले सांसद भएबापत प्राप्त गर्ने सेवा सुविधा पाउनेछन् ।