अखबार नेपाल ट्रेन्डिङ

काठमाडौ : जनता समाजवादी पार्टी (जसपा)ले तीन मन्त्री फिर्ता बोलाएर अरु तीन जनालाई मन्त्री बनाएकोप्रति पार्टीभित्र तीव्र असन्तुष्टी  पैदा भएको छ ।

राष्ट्रिय अध्यक्ष उपेन्द्र यादवले जसपाको तर्फबाट सरकारमा रहेका तीन जनालाई फिर्ता बोलाएर अन्य तीनजनालाई मन्त्री बनाउन प्रधानमन्त्री शेरबहादुर देउवालाई सिफारिस गरेका थिए ।

यादवले वन मन्त्रीमा प्रदीप यादव, भौतिक पूर्वाधार तथा यातायात मन्त्रीमा मोहम्मद इस्तियाक राई र मृगेन्द्र सिंह कृषि तथा पशुपन्छी विकास मन्त्रीमा सिफारिस गरेका थिए । जसअनुसार प्रधानमन्त्री शेरबहादुर देउवाले मन्त्रीमण्डल पुर्नगठन समेत गरेका छन् ।

जसपाबाट सामान्य प्रशासन मन्त्री राजेन्द्रप्रसाद श्रेष्ठलाई भने यथावत रहेका छन् । कृषि मन्त्री महिन्द्रराय यादव, भौतिक पूर्वाधार मन्त्री रेणु यादव र वन मन्त्री राम सहाय यादवलाई जसपाले सरकारबाट फिर्ता बोलाइएको थियो।

यसरी श्रेष्ठलाई मात्र सरकारमा निरन्तरता दिएपछि जसपाभित्र चरम असन्तुष्टी पैदा भएको हो । रेणुले उपेन्द्रलाई छोडेर अर्को पार्टीमा लाग्नसक्ने संकेत आफूहरु निकटहरुसँग गरेको समाचार बाहिर आएको छ ।

रेणुले विषेश गरी पार्टीको सचिवालय बैठकमा सबै मन्त्रीलाई फिर्ता बोलाउने कुरा भएपनि श्रेष्ठलाई निरन्तरता दिएकोमा उपेन्द्रसँग रुष्ट भएका हुन । उनले पार्टीमा अन्य महिला सांसद भएपनि कुनै पनि महिलालाई सरकारमा सहभागी नगराएकोमा आपत्ति समेत जनाएकी छिन् ।