अखबार नेपाल ट्रेन्डिङ

काठमाडौं: निर्माण ब्यवसायी महासंघका तत्कालीन अध्यक्ष शरदकुमार गौचनको हत्याका मुख्य योजनाकार समीरमान सिंह बस्नेतलाई सुन्धारास्थित कारागारमा भेट्न गएका प्रहरी वृत्त स्वयम्भूका प्रमुख प्रहरी नायब उपरीक्षक मिलन केसीलाई नेपाल प्रहरीले जिम्मेवारीबाट हटाएको छ ।

उनी समरिमानलाई भेट्न जेलमै पुगेपछि जिल्ला प्रहरी परिसर काठमाडौंले छानबिन गरेको थियो । छानबिनका क्रममा जेलभित्र रहेको डनलाई भेट्न जेल पुगेको खुलेपछि उनलाई रानीपोखरी तानेको हो ।

सुन्धारा कारागारमा रहेका बस्नेतलाई भेट्न केसी आइतबार पुगेका थिए । बस्नेतलाई भेट्न गएका विषयमा थप अनुसन्धान गर्नका लागि हिजो परिसरले समितिसमेत गठन गरेको छ ।

समीरमान सिंह बस्नेत २०७४ असोजमा निर्माण व्यवसायी महासंघका अध्यक्ष गौचनको हत्याका मुख्य योजनाकार हुन् ।

उनी सोही हत्या अभियोगमा पुर्पक्षका लागि थुनामा छन् । उनी काठमाडौको बाफल क्षेत्रमा रही गुण्डादर्गीमा सकृय रहदै आएका थिए ।