अखबार नेपाल ट्रेन्डिङ

काठमाडौं: सत्तारुढ दल नेपाल कम्युनिस्ट पार्टी नेकपाको सचिवालय बैठक आज बस्दै छ । गृहकार्य नपुगेको भन्दै पटक पटक सारिँदै आएको नेकपा सचिवालयको बैठक आज बस्न लागेको हो ।

नेकपाका अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहालबीच पोलिटब्युरो गठन र केन्द्रीय कमिटीको कार्यविभाजनबारे आइतबार छलफल भएपछि आज बैठक बस्न लागेको नेकपा स्रोतले जनाएको छ । अध्यक्षद्धयबिच सोमबार भएका् छलफलले निर्णयमा पुग्न केही सहज भएको विश्वाश गरिएको छ । नेकपा स्रोतका अनुसार अध्यक्षद्वय केपी शर्मा ओली र प्रचण्डवीचको छलफलमा ७७ जिल्लाका इञ्चार्ज र सह-इञ्चार्जहरुको नाम भने मोटामोटी टुंगो लगाएको छ ।

शीर्ष नेताको आन्तरिक छलफलपछि आज बस्ने सचिवालयले जिल्ला इञ्चार्ज र सह-इञ्चार्ज दुबैमा केन्द्रीय कमिटीका सदस्यहरूको नाम अनुमोदन गर्ने तयारी गरेको छ । आज बस्ने सचिवालयको बैठकबाट पोलिटब्युरो गठन र केन्द्रीय कार्यसमितिको कार्यविभाजनको विषयमा टुङ्गो लगाउने अनुमान गरिएको छ । बैठकमा पार्टीको एकता प्रक्रियालाई अन्तिम रूप दिन पोलिटब्युरो गठन, कार्यविभाजन तथा बाँकी रहेका एकता टुङ्गो लगाउने विषयमा छलफल हुने बताइएको छ । यसअघि जेठ १८ गतेका लागि सचिवालयको बैठक तय गरेको थियो तर अध्यक्षद्वय व्यस्त भएको कारण २० गतेका लागि सारिएको थियो ।