अखबार नेपाल ट्रेन्डिङ

काठमाडौं: दुबईबाट आएका व्यक्तिलाई अपहरण गरेको आरोपमा महानगरीय प्रहरी परिसर काठमाडौंले तीन जनालाई पक्राउ गरेको छ ।

काठमाडौंको तार्केश्वर नगरपालिका-८ जरङ्खु बस्ने ३२ वर्षीय सञ्जोग राई, ३० वर्षीय रमेश अर्याल र मकवानपुरगढी गाउँपालिका-५ घर भई काठमाडौं महानगरपालिका-१६ बसन्तनगरमा होटल सञ्चालन गर्ने ३१ वर्षीय गोकुल घिमिरेलाई पक्राउ गरेको हो ।

राई र अर्याललाई प्रहरीले जरङ्खुबाट पुस ३० गते शुक्रबार र घिमिरेलाई पुस २ गते बसन्तनगरबाट पक्राउ गरेको परिसरले जनाएको छ ।

उनीहरूले सिरहा सखुवानाकारट्टी गाउँपालिका-५ बस्ने ३० वर्षीय रामेश्वर रामलाई अपहरण गरेका थिए ।

उनी गत असोज ८ गते बिहान दुबईबाट काठमाडौं महानगरपालिका-९ स्थित अन्तर्राष्ट्रिय विमानस्थल आइपुगेका थिए ।

उनी काठमाडौं आएर बल्खुस्थित होटल कञ्चनजंगामा बस्न गएका थिए ।

त्यहाँबाट रामेश्वरलाई अपरिचित व्यक्तिहरूले अपहरण गरी काठमाडौं-२७ ज्याठास्थित होटल प्लेजर होमको कोठामा लगेर बन्धक बनाएको प्रहरीले बताएको छ ।

त्यहाँ लगेर रामेश्वरमाथि कुटपिट गरी ज्यान मार्ने धम्की दिएको र चुरोटको ठुटोले पोलेर यातना दिएको पक्राउ परेका व्यक्तिहरूमाथि आरोप छ ।

उनीहरूले मोबाइल लगायतका सामानहरू समेत लिएको आरोप छ ।

त्यही दिन साँझ ६ बजे रामेश्वर होटलबाट भागेर प्रहरीलाई खबर गरेका थिए ।

पछि उनले उनीहरू विरूद्ध जाहेरी दिएपछि अनुसन्धान गरी तीन जनालाई पक्राउ गरेको प्रहरीले जनाएको छ ।

पक्राउ परेका व्यक्तिहरूलाई काठमाडौं जिल्ला अदालतबाट ७ दिन हिरासतमा राख्न अनुमति लिई अनुसन्धान अघि बढाएको प्रहरीले जनाएको छ ।