अखबार नेपाल ट्रेन्डिङ

काठमाडौं: नेपाली कांग्रेसको १४औं महाधिवेसनमा सभापति उम्मेदवार शेरबहादुर देउवालाई पहिलो चरणको सभापतिको दौडबाट बाहिरिएका प्रकाशमान सिंह र विमलेन्द्र निधि दुबैले समर्थन गर्ने भएका छन् ।

देउवा प्रकाशमान र निधिलाई भेट्न उनीहरुकै निवासमा पुगेका थिए भने सो क्रममा दुबै नेताले देउवालाई दोस्रो चरणको चुनावमा समर्थन गर्न सहमत भएका हुन् ।

यससँगै दोस्रो चरणको चुनावमा देउवालाई सहज हुने देखिएको छ ।

पहिलो चरणको चुनावमा खसेको ४६७९ मध्ये देउवाले २२५८ मत पाएका थिए भने शेखर कोइरालाले १७०२, निधिले २५०, सिंहले ३७१ र कल्याण गुरुङले २२ मत प्राप्त गरेका थिए ।

कुनैपनि उम्मेदवारले बहुमत नल्याएपछि काँग्रेस सभापतिका लागि सर्वाधिक मत ल्याए दुई उम्मेदवार देउवा र कोइरालाबीच फेरि प्रतिस्पर्धा हुने भएको हो ।

मतदान मंगलबार साढे ३ बजेदेखि सुरु हुनेछ ।

यसैबीच सभापति चयनका लागि फेरि हुने चुनावमा प्रकाशमान सिंह र विमलेन्द्र निधिले शेरबहादुर देउवालाई समर्थन गरेपछि प्रतिस्पर्धी शेखर कोइरालाको समूह दोस्रो चरणको चुनावमा जाने नजाने विषयमा छलफल गरिहेका छन् ।

छलफलमा डा मीनेन्द्र रिजाल लगायत शेखर कोइराला समूहका नेता सहभागी छन् ।