अखबार नेपाल ट्रेन्डिङ

काठमाडौं: नेपाली कांग्रेसको १४औं महाधिवेशन अन्तर्गत पहिलो चरणको निर्वाचनबाट बाहिरिएका नेता प्रकाशमान सिंहले दोस्रो चरणको निर्वाचनमा शेरबहादुर देउवलाई समर्थन गर्ने भएका छन् ।

प्रकाशमानलाई भेट्न देउवा सिंह निवास चाक्सीबारी पुगेका थिए । सो भेटमा देउवालाई दोस्रो चरणको निर्वाचनमा देउवालाई समर्थन गर्ने निर्णय भएको सिंहले बताए ।

नेतृत्व परिवर्तन गर्नुपर्छ भनेर हामी प्रतिस्पर्धामा उत्रिएका हौं । देशभरिका बहुमत महाधिवेशन प्रतिनिधिले देउवाजीको पक्षमा मत जाहेर गरे । देउवाजीले मलाई सहयोग गर्न भन्नुभएको छ ।

विधान संशोधन र पार्टीमा भइरहेका कमिकमजोरी सच्याउने प्रतिवद्धता जाहेर गर्नुभएको छ । पार्टीभित्र सुधार ल्याउन र देउवाले कार्यशैली परिवर्तन गर्नुपर्ने उनले बताए ।

महाधिवेशनमा सभापति पदको अन्तिम मत परिणाम अनुसार देउवाले २२५८, शेखर कोइरालाले १७०२, प्रकाशमान सिंहले ३७१, विमलेन्द्र निधिले २५० र कल्याण गुरुङले २२ मत पाएका थिए ।

देउवाले ५१ प्रतिशत मत ल्याउन नसकेपछि दोस्रो चरणको निर्वाचन हुने भएको छ । त्यसअघि नै देउवालाई सिंहले समर्थन गर्ने निर्णय गरेका हुन् ।

यसैबीच प्रकाशमान सिंहको समर्थन लिएर देउवा निधिलाई भेट्न उनको निवासमा पुगेका छन् । अहिले उनीहरुबीच छलफल भइरहेको छ ।

विधान अनुसार दोस्रो चरणमा अब शेरबहादुर देउवा र शेखर कोइरालाबीच प्रतिस्पर्धा हुनेछ ।