अखबार नेपाल ट्रेन्डिङ

चितवन:  नेकपा (एमाले) को १०औं महाधिवेशन यतिखेर चितवनको सौराहामा जारी छ ।

आफ्नै समूहका नेताहरुको व्यवस्थापनमा समस्या परेपछि नेकपा एमालेका अध्यक्ष केपी शर्मा ओली आन्तरिक छलफलमा जुटेका छन् ।

आज सौराहमा बन्दशत्र सुरु गर्नुअघि एमाले अध्यक्ष ओलीले आफ्ना निकट नेताहरुसँग महासचिव ईश्वर पोखरेल, नेताहरु सुवासचन्द्र नेम्वाङ, विष्णु रिमाल, शंकर पोखरेल लगायतका नेताहरु छलफलमा बसेका थिए ।

बन्दसत्र क्षेत्रमा पुग्नु अघि आफू बसकेको रिसोर्टमा एमाले अध्यक्ष केपी शर्मा ओलीले पदाधिकारीमा सहमति गरेर जाने बताउँदै आकांक्षी नेताहरुसँग छलफल गरेका थिए । तर बैठकमा कुनै सहमति हुन सकेन । आकांक्षी नेताहरुले अडान नछोडेपछि उक्त बैठकले कुनै निष्कर्ष निकाल्न सकेन ।

अध्यक्ष ओली पदाधिकारीको विषयमा सर्बसम्मत नेतृत्व चयनका लागि प्रयत्नरत रहेका छन् । हिजो बसेको पार्टीको केन्द्रीय कमिटीको मध्यरातको बैठकले पदाधिकारी संख्या बढाउने निर्णय गरेसँगै नयाँ नेतृत्व चयन सर्वसम्मत हुने सम्भावना बढेको छ ।

पदाधिकारीमा सर्वसम्मति गरेर बाँकी पदका लागि चुनाव हुने सम्भावना देखिएको नेताहरुले बताएका छन् । अध्यक्ष ओलीले पार्टी पदाधिकारीमा सकेसम्म सर्बसम्मत गर्नेगरी  छलफल गरिरहेका छन्  ।

अध्यक्ष ओलीको ईश्वर पोखरेललाई वरिष्ठ उपाध्यक्ष बनाउने तयारी छ । ओलीले आफूलाई अध्यक्षमा टक्कर दिने घोषणा गरेका भीम रावलसहित सुवास नेम्वाङ, रामबहादुर थापा बादल, युवराज ज्ञवाली र अष्टलक्ष्मी शाक्यलाई उपाध्यक्ष बनाउने तयारी गरेका छन् ।

महासचिवमा शंकर पोखरेल आएमा विष्णु पौडेललाई पनि उपाध्यक्ष बनाउने तयारी ओलीले गरेका छन् । तीन उपमहासचिवमा प्रदीप ज्ञवाली, घनश्याम भुसाल र पृथ्वी सुब्बा गुरुङको सम्भावना बलियो छ ।

पदाधिकारी बाहेक केन्द्रीय सदस्यका लागि भने निर्वाचन हुने संभावना प्रवल देखिएको छ ।