काठमाडौं:  काठमाडौं उपत्यकामा मेलम्चीको पानी वितरणका लागि आवश्यक तयारी अन्तिम चरणमा पुगेको छ । मेलम्ची खानेपानी आयोजना कार्यान्वयन निर्देशनालयले अधिकांश स्थानमा नयाँ र कतिपय स्थानमा पुरानो पाइपबाट वितरणका लागि तयारी अघि बढाएको हो ।

काठमाडौं उपत्यकामा मेलम्चीको पानी आएपछि पुरानो पाइपबाट वितरण हुँदा नयाँ पाइपको परीक्षण सँगसँगै अघि बढाइनेछ । नयाँ निर्माण भएका पाइपहरुमा चुहावट छ/छैन भन्ने हेरिरहेको र कतिपय सानो क्षेत्रमा ट्याङ्करको पानीबाट परीक्षण भइरहेको छ । ठूलो क्षेत्रमा परीक्षण गर्न बाँकी भएको र त्यहाँ पानी उपत्यकामा खसेपछि परीक्षण हुने निर्देशनालयले जनाएको छ ।

पहिलो चरणमा मेलम्ची खोलाबाट दैनिक १७ करोड लिटर र दोस्रो चरणमा याङ्ग्री र लार्केखोलाबाट थप १७/१७ करोड गरी जम्मा ५१ करोड लिटर पानी उपत्यकामा आउने छ । पहिलो चरणमा दैनिक आउने १७ करोड लिटर पानीको वितरणका लागि पूर्वाधार निर्माण गरिएको निर्देशनालयले जनाएको छ ।

यो पानी पहिलो चरणमा मध्यपुर, कीर्तिपुर र चक्रपथभित्र सबै ठाउँमा वितरण हुनेछ । चक्रपथ बाहिर कपनमा पानी वितरणका लागि पाइप निर्माण अघि बढाइएको र अहिले यी तीन ठाउँमा मात्रै पानी वितरण हुने निर्देशनालयले जनाएको छ ।

उपत्यकामा १० स्थानमा ट्याङ्की निर्माण गर्ने योजना बनाएको भए पनि अहिलेसम्म नौ स्थानमा मात्रै निर्माण सम्पन्न भएको छ । नयाँ पाइपलाइन नभएका स्वयम्भू, ताहचल, पानीपोखरीलगायतका स्थानमा चालु आवभित्रै निर्माण सम्पन्न गरिने छ ।

काठमाडौंमा लाजिम्पाट, बाँसबारी पानीपोखरी, बालाजु, महाँकाल, ललितपुरको खुमलटार र भक्तपुरको कटुञ्जेलगायतका स्थानमा ट्याङ्की रहेका छन् । गत असार महिनामा सुरुङको परीक्षण गर्दा दुर्घटना भएपछि सुरुङमा पुनः परीक्षण गर्न लागिएको हो ।

त्रुटि सच्याउने काम सकिन लागेकाले पुनः सुरुङमा पानी पठाएर परीक्षण गर्ने योजना बनाइएको छ । त्रुटि सच्याउने कामसँगै सुरुङमा पुनरावलोकनको काम भइरहेको र सुरुङमा पानी पठाउन थालिएको दुई महिनासम्म परीक्षण गर्न समय लाग्ने खानेपानी मन्त्रालयले जनाएको छ ।

मन्त्रालयले बनाएको कार्यविधिअनुसार थोरै परिमाणमा पानी पठाइने र सुरुङमा पानी भरिएपछि पनि केही दिन ‘होल्ड’ गरेर राखिने छ । कतै समस्या छैन भन्ने भएपछि मात्रै पानी झारिने जनाएको छ ।

यो पनि पढ्नुहोस् :

राजश्व संकलनका लागि शनिबार बैंक तथा वित्तिय संस्थाहरु खुल्ने