अखबार नेपाल ट्रेन्डिङ

काठमाडौं:  महानगरीय ट्राफिक प्रहरी महाशाखाले काठमाडौंका चोक चोकमा डमी राख्दै गीतहरू बजाउन थालेको छ। सडक प्रयोगकर्ताहरू सर्वसाधारण र चालकलाई लक्षित गरी ट्राफिक नियम पालनामा सचेत गराउने उद्देश्यले  ट्राफिक सचेतनासँग सम्बन्धी गीत सुनाँउन थालिएको हो ।

महानगरीय प्रहरी कार्यालय रानीपोखरीका प्रमुख तथा प्रहरी नायब महानिरीक्षक (डीआईजी) विश्वराज पोखरेलले सांगीतिक डमी अभियानको शनिबार शुभारम्भ गर्नु भएको छ । उक्त अभियानले ट्राफिक नियम, सडक अनुशासन र सडक सचेतना अभिवृद्धि गर्ने कार्यमा सहयोग पुग्ने महाशाखाले जनाएको छ।

अभियान शुभारम्भमा कलाकारहरू मदनकृष्ण श्रेष्ठ, हरिवशं आचार्य, दिपाश्री निरौला, जितु नेपालले प्रस्तुती राखेका थिए । मानिसले गीत संगीत मन पराउने भएकोले सोको माध्यमबाट ट्राफिक नियम सिकाउँदा चालक र यात्रुले सजिलोसँग सम्झना गर्न सक्ने महाशाखाले जनाएको छ ।

सवारी साधनको बढी चाप हुने काठमाडौंको मुख्य ५ वटा चोकहरू कोटेश्वर, बानेश्वर, रत्नपार्क शान्तिवाटिका, कंलकी र गोंगबु नयाँ बसपार्कमा डमीको माध्यमबाट गीत बजाएर ट्राफिक सचेतना गराइने छ। दैनिक बिहान ३ घण्टा र बेलुका ३ घण्टा गीत बजाइने छ । महाशाखाले एक महिनामा एक लाख सडक प्रयोगकर्तालाई सचेत गराउने लक्ष्य राखेको छ।