अखबार नेपाल ट्रेन्डिङ

काठमाडौं:  सोलुखुम्बुको थुलुङ दूधकोशी गाउँपालिका–२ स्थिति काँगेलडाँडा विमानस्थल  संचालनमा आउने भएको छ । संस्कृति, पर्यटन तथा नागरिक उड्ययन मन्त्री योगेशकुमार भट्टराईले मङ्सिरदेखि काँगेलडाँडा विमानस्थल पुनःसञ्चालन गर्ने जानकारी दिए।

वि सं २०५२ मा निर्माण शुरु भएको विमानस्थलमा २०६३ सालदेखि उडान सेवा शुरु भएकोमा वि सं २०७२ मा उडान बन्द भएको थियो । पाँच वर्षदेखि बन्द उक्त विमानस्थल सञ्चालनका लागि स्थानीय तहसँग समन्वय गरी साताको एक दिन भए पनि उडान शुरु गरिने भएको हो ।

प्रदेश नं. १ का नेपाल कम्युनिस्ट पार्टी संसदीय दलका प्रमुख सचेतक बुद्धीकुमार राजभण्डारीले तीनै तहको सरकारको अनुदानबाटै भएपनि विमानस्थललाई नियमित सञ्चालन गर्नुपर्ने बताए। उनले काठमाडौंबाट र कांगेलबाट र विराटनगर-काँगेल उडानका लागि तयारी गर्न आग्रह गरे।

अर्का प्रदेशसभा सदस्य उत्तम बस्नेतले गाउँगाउँमा सडक पुगेसँगै कांगेलडाँडा विमानस्थल सञ्चालनको बलियो आधार बन्दै गएको बताउनु भयो । नेकपा सोलुखुम्बुका अध्यक्ष मानवीर राईले विमानस्थल स्तरोन्नतिका लागि भएका पहल सकारात्म रहेको बताउनु भयो । थुलुङ दूधकोशी गाउँपालिका अध्यक्ष असिम राईले विमानस्थगल पुनःसञ्चालनका लागि स्थानीय सरकारसंग साझेदारी गर्न प्रतिबद्ध रहेको बताए।