अखबार नेपाल ट्रेन्डिङ

काठमाडौं: कोरोना भाइरस संक्रमितको संख्या बढ्दै गएपछि जोखिम न्यूनीकरणका लागि भन्दै बिहीबारदेखि सरकारले यातायातका साधनमा जोर विजोर प्रणाली लागु गर्ने निर्णय गरेको छ ।

गृह मन्त्रालयले बुधबार राति जारी गरेको बिज्ञप्ति अनुसार अब साँझ ७ बजेदेखि बिहान ७ बजेसम्म काठमाडौँ उपत्यका प्रवेशमा पनि प्रतिबन्ध लगाइएको छ । अत्यावश्यक र ढुवानीका साधनमा भने यो प्रतिबन्ध लागू हुने छैन । यस्तै सरकारले निर्णय गरेको बाहेक अन्यलाई अन्तर्राष्ट्रिय सीमामा आवतजावत समेत बन्द गरिएको जनाएको छ ।

यस्तै विभिन्न जिल्ला तथा क्षेत्रहरुमा कोरोनाको जोखिम बढेमा जिल्लास्थित कोभिड–१९ महामारी व्यवस्थापन सञ्चालन केन्द्रले आवश्यक निर्णय गरी कडाई गर्नपनि अधिकार प्रत्यायोजन गरिएको छ । सरकारले यही साउन ६ गते लकडाउन अन्त्यको घोषणा गरेको थियो । तर, त्यसयता लगातार कोरोना संक्रमितको संख्या बढेपछि सरकारले कडाई गरेको हो ।

सरकारले लकडाउन अन्त्यको घोषणा गर्दा ४० जना संक्रमितको मृत्यु भएकोमा त्यसयताका १५ दिनमा थप २० जनाको मृत्यु भएको छ । मृतक र संक्रमित बढेसँगै प्रधानमन्त्री केपी शर्मा ओलीले मंगलबार विज्ञहरूसँग लकडाउन गर्ने या नगर्ने भन्नेबारेमा परामर्श समेत गरेका थिए ।